Strandbærinn Albir á Costa Blanca er sætur, lítill og notalegur bær rétt við hinn fjöruga strandstað Benidorm sem svo margir þekkja. Örskammt frá Albir er Altea sem þykir einstaklega skemmtilegur og þá sérstaklega gamli bærinn.

Albir Albir er einstaklega skemmtilegur bær þar sem frábært er að njóta lífsins í sumarfríinu. Hér eru lágreistar byggingar sem gefa bænum fallegt yfirbragð. Bærinn þykir afar fjölskylduvænn og býður alla þá fjölbreyttu þjónustu sem þarf til þess að gera gott frí enn betra. 

Ströndin í Albir er sérlega falleg steinvöluströnd sem hefur hlotið „bláa flaggið“ sem er gæðavottun á vegum Evrópusambandsins og einungis hreinum og tærum ströndum hlotnast. Með fram ströndinni allri liggur skemmtileg strandgata, lögð sléttum marmaraflísum sem henta vel til göngu, göngu með barnakerru eða til þess að renna sér á línuskautum, fyrir þá sem vilja fara hratt yfir. Gatan sú er kölluð „Stjörnustræti“ eða „Paseo de las Estrellas“ og er fyrirmyndin engin önnur en „Hollywood – walk of fame“ gatan með stjörnum er prýða nöfn leikara og leikstjóra frægra kvikmynda. 

Yfir sumartímann má finna litla markaði þar sem unnt er að kaupa skartgripi, leðurvörur og minjagripi. Við strandgötuna er líka fjöldi verslana og veitingastaða og vilji maður taka langa göngu má ganga alla leið að vitanum með fram ströndinni. 

Þá þykir útsýnið til hafs eitt það fallegasta við Miðjarðarhafið. 

Altea Stutt er í gamla bæinn í Altea og upplagt að verja þar eins og hálfum degi, skoða gömlu kirkjuna og þröngu strætin sem liggja upp að kirkjutorginu. Á þeirri leið upplifir maður ekta spænska stemningu, þar sem hér eru einungis göngugötur með litlum, sætum verslunum og í mörgum þessara húsa eru einhverjir bestu veitingastaðir svæðisins, sem byggja allir á gömlum spænskum hefðum. Til Altea eru einungis um 5─10 mínútur með leigubíl en frá Albir ganga einnig strætisvagnar þangað. Ef þig langar að dvelja á góðum, fjölskylduvænum og notalegum stað, upplifa ekta spænska menningu en þó dvelja í nálægð við ys og þys Benidorm þá eru Albir & Altea staðirnir.

Hér finnur þú hagnýtar upplýsingar um áfangastaðinn Albir & Altea / Costa Blanca