Sól
Borg
Golfferðir
Sérferðir
Hreyfing
Sigling
Flugsæti

Fagra Slóvenía

 

Fararstjóri: Ágústa Sigrún Ágústsdóttir

Í þessari fjölbreyttu sérferð 8. júní í 10 nætur munum við kynnast hinni gullfallegu Slóveníu en landið er löngum þekkt fyrir náttúrufegurð sína: alpa, skóga, ár og vötn, hella og glæsilega kastala sem prýða útsýnið. Við munum kynnast mörgum fallegum bæjum í þessari ferð og við heimsækjum einnig höfuðborgina, Ljubljana. Ferðin endar í Portoroz eða „Rósahöfninni“ sem stendur við Adríahafið.

Flogið er frá Keflavík til Trieste á Ítalíu. Við byrjum á að aka til fjallaþorpsins Kranjska Gora sem liggur í hlíðum slóvensku alpanna (Júlíönsku Alparnir), en þar munum við njóta sveitasælunnar fyrstu tvær næturnar. Á leið okkar til Kranjska Gora þorpsins ökum við meðfram þjóðgarðinum Triglav sem fær nafn sitt af hæsta fjalli Slóveníu en þar kynnumst við mörgum fallegum þorpum á leið okkar.

Á þriðja degi ökum við til vatnanna Bohinj og Bled og höldum áfram að njóta undurfagurrar náttúrunnar sem lætur engan ósnortinn. Við gistum í eina nótt í bænum Bled sem stendur við samnefnt vatn í hlíðum Karawanks fjallgarðsins, rétt við landamæri Austurríkis.

Næst liggur leið okkar til höfuðborgarinnar Ljubljana en borgarferð þangað hefur verið mjög vinsæl hjá Heimsferðum, en borgin þykir afar falleg og þægileg að stærð til að fara um hana fótgangandi. Dvalið er í Ljubljana í 2 nætur. Frá Ljubljana er leiðinni haldið til láglendis Slóveníu og gist í bænum Novo Mesto. Við getum ekki heimsótt Slóveníu án þess að koma við í hinum frægu Postojna dropasteinshellum. Ferðin endar svo í strandbænum Portoroz þar sem við munum gista síðustu 3 næturnar en Portoroz er fallegur bær og auðvelt er að heimsækja nágrannabæinn Piran en þangað er hægt að fara fótgangandi. Flogið heim frá Trieste til Keflavíkur.

Innifalið: Flug og skattar. Akstur samkvæmt ferðatillögun. Gisting á 4* hótelum með morgunverði alla daga, 7 kvöldverðir innifaldir (dagana 1, 2, 3, 4, 6, 7 og 8). Einnig er innifalið í verði: aðgangseyrir í safnið Liznjek, sigling um vatnið Bled í Pletna bát og aðgangseyrir í kirkju á Bled eyju, kynnisferðir í Bled, Ljubljana Novo Mesto og sigling með léttum hádegisverð í Novo Mesto, heimsókn í Hús Etno, aðgangseyrir í safn Cerknica vatnsins og aðgangseyrir í Postojna hellana.

Íslensk fararstjórn. Miðað við lágmarksþáttöku 20 manns.

Ferðatilhögun

Dagur 1 – Ferðast til Slóveníu

8. júní / föstudagur
Flogið er með Primera Air í beinu flugi til Trieste á Ítalíu. Brottfarartími í Keflavík er kl. 08:30 en komutími til Trieste er kl. 14:40. Frá flugvellinum í Trieste ökum við um glæsilegt landslagið vestan við þjóðgarðinn Triglav í Slóveníu. Ekið er meðfram ánni Soca á leið okkar til fjallabæjarins Kranjska Gora sem er þekktur skíðaáfangastaður sem stendur við slóvensku alpana og er því umhverfið einstaklega fallegt. Á leið okkar til Kranjska Gora ökum við í gegnum mörg falleg þorp, m.a. Nova Gorica, Tolmin og Bovec. Ökuferðin tekur um 3 klst. og því munum við stoppa í einhverju þorpanna og teygja úr fótunum og fá okkur hressingu. Í Kranjska Gora munum við gista í 2 nætur á 4* hótelinu Kompas m/morgunmat innifalinn alla daga ásamt kvöldverði fyrsta kvöldið.

Dagur 2 – Jasna vatnið & Tamardalur

9. júni / laugardagur
Við njótum morgunverðar á hótelinu áður en við höldum af stað út í náttúruna. Umhverfið er einstakt á þessum stað, tignarleg há fjöllin allt í kring og gróðursæll dalurinn fær mann til að gleyma stað og stund. Farið verður í göngutúr til að kynnast nánasta umhverfi, við förum inn í bæ Kranjska Gora, göngum upp að vatninu Jasna og skoðum áhugavert safn í gömlu alpahúsi (Liznjek). Eftir hádegi ökum við til Tamardalsins sem er í næsta nágrenni og skoðum hæstu skíðastökksaðstöðu heims (250 m.) og njótum dagsins þar, ökum svo aftur til Kranjska Gora.

Dagur 3 – Bohinj & Bled

10. júní / sunnudagur
Við borðum morgunmat á hótelinu og öndum að okkur ferska fjallaloftinu í Kranjska Gora áður en við ökum af stað til Bohinj. Vatnið Bohinj er í þjóðgarðinum Triglav, en Bohinj er stærsta vatn Slóveníu. Héðan sést til Júlíönsku Alpanna í norðri þar sem hæsta tind Slóveníu er að finna, Triglav (2.864 m.). Við bendum þeim allra hugrökkustu á að hægt er að fara í kláfi upp fjallið Mount Vogel (yfir 1.500 m. og kostar €15). Seinni part dags ökum við til bæjarins Bled þar sem við ætlum að gista næstu nótt á 4* hótelinu Lovec. Kvöldverður og morgunverður innifalinn.

Dagur 4 – Bled & Ljubljana

11. júní / mánudagur
Vatnið Bled er einnig á sérlega fallegu og skógi vöxnu svæði. Kastalinn Bled skemmir ekki útsýnið, hann stendur tignarlegur fyrir ofan vatnið. Gengið er um bæinn og fararstjóri sýnir helstu staði og kennileiti og þeir sem vilja geta farið í kastala Bled. Eftir hádegi siglum við út í Bled eyjuna á „pletna“ bátum sem eru einkennandi fyrir staðinn og skoðum kirkjuna sem þar stendur. Haldið er til Ljubljana, höfuðborgar Slóveníu, rétt fyrir kvöldmatarleytið (u.þ.b. 45 mín. akstur). Gist á góðu 4* hóteli, G Design, í 2 nætur m/morgunmat innifalinn alla daga ásamt kvöldverði fyrsta kvöldið.

Dagur 5 – Dvalið í Ljubljana

12. júní / þriðjudagur
Við byrjum daginn á að fara gangandi í stutta kynnisferð um borgina. Borgin er einstaklega notaleg, með lífleg torg, falleg hús og fjöldamörg veitinga- og kaffihús, listasmiðjur og verslanir. Það má segja að Ljubljana sé notaleg blanda af smáborg og stöðugt vaxandi heimsborg. Þeir sem vilja geta farið í Ljubliana kastalann sem þykir áhugavert að heimsækja. Eftirmiðdagur frjáls. Farþegar verða sóttir seinnipart dags í miðbænum og ekið upp á hótel. Kvöldverður á hóteli.

Dagur 6 – Bærinn Novo Mesto

13. júní / miðvikudagur
Við förum af hótelinu um morguninn og ökum áleiðis til bæjarins Novo Mesto. Bærinn Novo Mesto er staðsettur á láglendi Slóveníu. Hérna eru fallegar ekrur og bærinn heillandi eins og svo margir bæir í Slóveníu, húsabyggðin í bænum er þétt á litlu svæði sem umkringt er af ánni Krka. Við byrjum á að fara í stutta kynnisferð um bæinn og síðan verður boðið upp á léttan hádegisverð á meðan siglt er um ána. Gist á 4* hóteli, Hotel Balnea en þar verður boðið upp á kvöldverð.

Dagur 7 – Dvalið í Novo Mesto

14. júní / fimmtudagur
Frjáls fyrripartur dags. Hægt er að fara í göngutúr um sveitina eða nýta sér sundlaugarnar í heilsulind hótelsins. Seinni partinn heimsækjum við hús í sveitinni kallað Etno house og fáum að vita svolítið meira um vín heimamanna, „Cvicek“. Kvöldverður á hótel Balnea.

Dagur 8 – Postojna & Portoroz

15. júní / föstudagur
Við förum af hótelinu um morguninn og ökum í gegnum sveitirnar til Postojna hellana en þeir eru án efa frægustu dropasteinahellar þessa svæðis. Við heimsækjum einnig safn Cerknica vatnsins sem er merkilegt safn m.a. um lífríki og árstíðabundnar breytingar þessa vatns. Við endum daginn á því að aka til strandbæjarins Portoroz þar sem við munum gista það sem eftir er ferðar á 4* hótelinu Neptun. Kvöldverður innifalinn.

Dagur 9 – Njótum Portoroz

16. júní / miðvikudagur
Frjáls dagur í Portoroz. Við mælum með að taka strætó til bæjarins Piran sem stendur yst á skaganum en er einungis í 10 mínútna akstursfjarlægð.

Dagur 10 – Njótum Portoroz

17. júní / miðvikudagur
Frjáls dagur í Portoroz. Við höldum áfram að njóta þessa fallega strandbæjar á þjóðhátíðardeginum okkar Íslendinga.

Dagur 11 – Flogið til Íslands

18. júní / fimmtudagur
Eftir góða dvöl í Portoroz kveðjum við Slóveníu og höldum til flugvallarins í Trieste. Flogið er heimleiðis kl. 13.10 með Primera Air. Komutími til Keflavíkur kl. 15:40.

Deila núverandi vefslóð með tölvupósti