Sólarferð
Borgarferð
Golfferðir
Hreyfiferðir
Sérferðir
Sportferðir
Siglingar
Flugsæti

Vindeyjar - Sikiley

Mögnuð gönguferð til Vindeyja – Le Isole Eolie – hins ævintýralega eldfjallaeyjaklasa norður af Sikiley. 

Í ferðinni verður farið í valdar dagsgöngur eftir ægifögrum göngustígum á milli litskrúðugra þorpa, gróðursællra unaðslunda og fjallstinda með óviðjafnanlegu útsýni yfir nokkrar af rómuðustu náttúruperlum Suður-Ítalíu. Meðal annars verður gengið á eldfjöllin á eyjunum Vulcano og Stromboli, þar sem látlaus eldvirknin hefur réttilega fært þeim viðurnefnið "Viti Miðjarðarhafsins".

Í ferðinni kynnumst við einstakri menningu Sikileyinga er rekja má allt aftur til forsögulegs tíma, í gegnum hámenningu fornaldarinnar hjá Grikkjum og Rómverjum, til yfirtöku Mára, Normanna og Spánverja á seinni öldum. Við kynnumst ómótstæðilegu mannlífi og ósnortinni náttúru, þar sem tækifæri gefst til að njóta sérstakrar matarmenningar og gestrisni sem á sér engan sinn líkan í veröldinni. Við heimsækjum Cefalú, fallegan bæ á norðurströnd Sikileyjar, þaðan sem haldið verður til Vindeyja, sjö eldfjallaeyja sem kunnastar eru fyrir eldvirknina á Vulcano og Stromboli. Vindeyjar eru á lista Sameinuðu Þjóðanna yfir náttúruvætti og eru rómaðar fyrir fegurð sína og einangrun, en þær draga nafn sitt af guði vindanna, Èolo er kaus að gera þær að heimkynnum sínum. Dvalið verður á Lipari og Stromboli, þaðan sem göngustígarnir bera ferðalanginn upp frá litskrúðugum fiskimannaþorpum í gegnum villtan og ilmsterkan miðjarðarhafsgróður, yfir hraunbreiður, hvítt gjall og svarta sanda, að gígum, klettum, víkum og höfðum, þar sem svalandi fagurblámi hafsins um kring er ómótstæðilegur. Ferðalok verða í borginni Catania, við rætur eldfjallsins Etnu, þaðan sem flogið er aftur til Íslands.

Hótel sem dvalið verður á:

9.–11. október Hotel Santa Lucia/le Sabbie D'oro 3* Cefalú.
Kvöldverður: 10. október.

11.–15. október Hotel Gattopardo Park 4* Lipari
Kvöldverður: 12/13/15. október.

15.–18. október Hotel Villaggio Stromboli 3* Stromboli.
Kvöldverður: 16. október.

18.–19. október Hotel Katane Palace 4* Catania

Innifalið: Flug, skattar, 1 taska 23 kg á mann. Gisting á 3* og 4* hótelum í 10 nætur með morgunverði. Íslensk fararstjórn miðað við lágmarksþátttöku 20 manns. Akstur til og frá flugvelli og á milli áfangastaða. 5 kvöldverðir: 9/11/12/14/15. október. Bátsferðir: 11/12/13/14/15/18. október. 

Ekki innifalið: Valfrjálsar báts- og kynnisferðir, ferðamannaskattur á hótelum, þjónusta eldfjallasérfræðings á Stromboli, aðgangseyrir að söfnum, kláfum, bátum og annað sem ekki er tilgreint að ofan.
Athugið: Ofangreind dagskrá er birt með fyrirvara. Heimsferðir áskilja sér rétt til að breyta dagskrá ef á þarf að halda með tilliti til veðurs og annarra aðstæðna, að sjálfsögðu með heill farþega í fyrirrúmi.

Ferðatilhögun

Dagur 1 – Flogið til Sikileyjar

Flogið er beint til Palermo á Sikiley. Flugtímar liggja ekki fyrir eins og er. Ekið frá flugvelli til Cefalú (70 km.). Við komum okkur fyrir á hóteli, fáum okkur síðbúinn kvöldverð og stutta gönguferð um miðbæinn. Gisting og kvöldverður í Cefalú. 

Dagur 2 – Cefalú

Við hefjum daginn á því að fá okkur léttan göngutúr um Cefalú; leggjum á "heimaklettinn" sem vakir yfir bænum, skoðum dómkirkjuna og þær einstöku mosaíkmyndir sem hún hefur að geyma (12. öld), látum okkur síðan líða um þröng strætin á leið okkar á einhvern af hinum stórkostlegu fiskveitingastöðum sem bíða í röðum við gömlu höfnina. Gisting í Cefalú. Gönguupplýsingar: 4 km. / 3 klst. / +-200 m. 

Dagur 3 – Lipari

 Í dag er stefnan tekin á Vindeyjar. Við ökum frá Cefalú til Milazzo, þaðan sem við tökum bát til eyjunnar Lipari þar sem við munum gista í fjórar nætur. Við komum okkur fyrir á gististað og fáum okkur síðan hádegisverð áður en við höldum af stað í létta gönguferð út úr bænum. Við höldum til suðurodda eyjunnar, þaðan sem við höfum stórfenglegt útsýni yfir til eyjunnar Vulcano og meðfram klettóttri ströndinni. Héðan höldum við í gegnum þéttan miðjarðarhafsgróðurinn, áður en við tökum brattan stíg aftur niður til bæjarins í Lipari. Gisting og kvöldverður á Lipari. Gönguupplýsingar: 6 km / 4 klst / +-400 m.

Dagur 4 – Lipari

Við byrjum daginn á því að sigla til Vulcano þar sem við göngum á eldfjallið La Fossa (391 m.). Hér lita bullandi smáhverir umhverfið og útsýnið yfir eyjaklasann og bæinn fyrir neðan er engu líkt. Er við komum aftur niður á ströndina gefst okkur tækifæri á að fara í "sjóðandi" sjó og heit leirböð áður en við tökum bátinn aftur yfir til Lipari. Gisting og kvöldverður á Lipari. Gönguupplýsingar: 5 km / 3 klst / +-400 m. 

Dagur 5 – Salina

Í dag förum við til eyjunnar Salina, sem er kunn sem baksvið kvikmyndarinnar "Il Postino". Hér göngum við meðfram ströndinni í átt til bæjarins Lingua, þar sem við fáum að smakka á hefðbundinni matargerð eyjaskeggja. Leiðin liggur innan um kapers og vínvið, sem eru helstu framleiðsluvörur eyjaskeggja. Hér drekkum við í okkur angan gróðursins og njótum sérstakrar fegurðar eyjunnar, áður en við siglum aftur sem leið liggur til Lipari. Gisting á Lipari. Gönguupplýsingar:  6 km / 4 klst / +-100 m.

Dagur 6 – Panarea

Í dag heimsækjum við Panarea, minnstu eyjuna í eyjaklasanum. Frá höfninni liggur leiðin upp brattann og eftir fjallshryggnum ofan við hvítmáluð húsin í San Pietro, þaðan sem fagurt útsýni er yfir kletta og dranga allt í kringum eyjuna. Við komum niður að vogskorinni ströndinni við Junco höfða, þar sem við virðum fyrir okkur rústir frá forsögulegum tíma. Þegar við komum aftur til bæjarins njótum við stemmningarinnar, þar sem við fáum okkur sítrónuískrap eða glas af Malvasia, sérstöku eftirréttavíni heimamanna. Siglt til baka til Lipari. Gisting og kvöldverður á Lipari. Gönguupplýsingar: 5 km / 4 klst. / +-400 m. 

Dagur 7 – Lipari & Stromboli

Í dag liggur leiðin til Stromboli þar sem við gistum næstu þrjár nætur. Fyrri hluta dags notum við til þess að fara í létta gönguferð um bæinn, þar sem skoðum m.a. Kastalaborgina og klaustrið í Lipari. Síðan fáum við okkur hádegisverð, gerum okkur ferðbúin og siglum síðan í eftirmiðdaginn til Stromboli. Hér komum við okkur fyrir á hóteli, njótum stórfenglegs útsýnisins upp á eldfjallið og út á hafið til Strombolicchio. Gisting og kvöldverður á Stromboli. 

Dagur 8 – Stromboli

Fyrri hluta dags förum við í gönguferð um bæinn okkar, virðum fyrir okkur litskrúðuga stemmninguna og fáum okkur hressingu að hætti heimamanna á einhverjum af ótalmörgum veitingastöðum í þorpinu. Undir kvöld hefjum við gönguna á sjálft eldfjallið, leið okkur liggur upp eftir bröttum og söndóttum hlíðum fjallsins, sem við skoðum í fylgd eldfjallasérfræðings. Um það leyti sem myrkrið skellur á höfum við náð fjallstindinum, þar sem við verðum vitni að einstöku sjónarspili þessa rómaða eldfjalls. Hér er virknin næstum stöðug og í rökkrinu njótum við eldhræringanna til fullnustu. Gangan á tindinn er stíf en hér er hátindi ferðarinnar náð og héðan svífum við léttilega niður í átt að ljósunum í bænum, snæðum síðbúinn kvöldverð og gleðjumst yfir afrekum okkar. Gisting á Stromboli. Gönguupplýsingar; 7 km / 6 klst / +-900 m. 

Dagur 9 – Stromboli

Fyrri hluta dags hvílum við lúin bein, njótum strandarinnar neðan við gististaðinn okkar eða göngum um bæinn. Seinnipartinn leggjum við á stað til Sciara del Fuoco til að virða fyrir okkur grjóthrunið sem fellur stöðugt niður hlíðarnar og í sjó fram frá sívirkum gígunum fyrir ofan. Við borðum síðan kvöldverð þaðan sem við njótum eldglæringanna upp í fjalli, áður en við snúum til baka inn í bæinn. Gisting á Stromboli. Gönguupplýsingar: 8 km. / 5 klst. / +-400 m. 

Dagur 10 – Catania

Við hefjum daginn á því að sigla til Milazzo, þaðan sem við ökum er leið liggur til Catania. Eftir að við höfum komið okkur fyrir á gististað höldum við í skoðunarferð um borgina, þar sem við kynnumst betur hinni fornu menningu Sikileyinga í Catania. Um kvöldið njótum við fjölskrúðugrar matarmenningar miðjarðarhafsins, þar sem margskonar fiskmeti, grænmeti og ávextir, auk ómótstæðilegra eftirrétta heimamanna verða ekki langt undan. Gisting í Catania.  

Dagur 11 – Flogið til Íslands

Flogið frá Catania til Keflavíkur. Flugtímar liggja ekki fyrir eins og er.  

Deila núverandi vefslóð með tölvupósti