Sól
Borg
Golfferðir
Sérferðir
Hreyfing
Sigling
Flugsæti

Gönguferð á Madeira

Hin sívinsæla gönguferð á Madeira

Fararstjóri: Níels Rask Vendelbjerg

Gönguferð er skemmtilegur valkostur fyrir þá sem vilja hreyfa sig og sjá nýja staði og fjölbreytt landslag. Ferðir sem slíkar sameina heilsusamlega útivist í nýju og framandi umhverfi og gefa fólki innsýn í líf og staðarhætti upp til sveita.

Í þessari ferð verður farið í 6 göngur á ýmsum stöðum á eyjunni. Farið verður í eina kynnisferð um höfuðborgina Funchal en einnig eru 2 frídagar sem hver og einn getur skipulagt að eigin vild. Miðað er við að sjálfar göngurnar taki á bilinu 3 - 5 tíma en gengnir eru u.þ.b. 7 til 12 km á dag.

Gönguferðirnar á Madeira eru yfirleitt farnar á þægilegum stígum umvöfðum litríkum gróðri og blómaangan en gjarnan er gengið með fram gömlum árveituskurðum sem heimamenn nefna „Levadas“. Hluti af þessum árveituskurðum eru allt frá 16. öld og voru þeir notaðir til að flytja regnvatn frá fjöllunum í norðri til suðurhlutans sem er mun sólríkari og þurrari en sá nyrðri.

Göngurnar eru fjölbreyttar og ýmist er gengið með fram rennandi lækjum, um gróðursæla dali með útsýni yfir tignarleg fjöll en einnig kynnumst við landslagi austurhluta eyjunnar þar sem gróðurinn og umhverfið er mjög ólíkt.

Gist er á hótelinu Orquidea (3*) sem er staðsett í miðbæ Funchal í 14 mínútna göngufjarlægð frá strandlínunni.

„Gönguferð á Madeira“ er án efa spennandi valkostur til þess að kynnast þessari fallegu eyju.

 

Innifalið: Flug og skattar, innrituð 23 kg taka, 10 kg. handfarangur. Gisting á 3 stjörnu hóteli með morgunverði. Rútuferðir til og frá flugvelli og í allar gönguferðir. Fylgd fararstjóra í allar gönguferðir. Kynnisferð um borgina Funchal. Íslensk fararstjórn miðuð við lágmarksþátttöku 16 manns.

Ekki innifalið: Annað sem ekki er tekið fram.

Ath! Verð er miðað lágmarksþátttöku 16 manns. Ferðatilhögun er birt með fyrirvara. Heimsferðir áskilja sér rétt til að breyta dagskrá ef á þarf að halda með tilliti til veðurs og annarra aðstæðna, að sjálfsögðu með heill farþega í fyrirrúmi.

Ferðatilhögun

Dagur 1 – Flogið til Madeira

29. apríl / mánudagur
Flug með Primeraair til eyjunnar Madeira sem tilheyrir Portúgal. Flugtak kl. 08:00, lending kl. 13:45 að staðartíma. Frá flugvellinum til hótelsins eru u.þ.b. 20 km. akstur.

Gist er á 3* hótelinu Orquidea í 10 nætur, með morgunverði. Hótelið er vel staðsett í miðbæ Funchal skammt frá ráðhúsinu og aðeins í 14 mínútna göngufjarlægð frá ströndinni. Á veitingastað hótelsins, „Villa Mar“ geta gestir notið matreiðslu heimamanna en á hótelinu er einnig bar þar sem boðið er upp á snarl og drykki. Herbergin eru öll með loftkælingu (án aukagjalds) og baðherbergin eru bæði með baðkari og sturtu. Á þaki hótelsins er sólbaðsaðstaða þar sem hægt er að hvíla lúin bein eftir langar göngur!

Dagur 2 – Kynnumst Funchal

30. apríl / þriðjudagur
Við byrjum ferðina á að kynnast höfuðborginni Funchal. Eftir morgunverð er haldið af stað í hálfdags kynnisferð um borgina og nágrenni.

Í upphafi ferðar er farið í sérstaka útsaumsverksmiðju og fylgst með störfum og handbragði starfsmanna. Því næst er ferðinni heitið á líflegan og ekki síður litríkan markað heimamanna en þar má sjá ótrúlegt úrval blóma, ávaxta og grænmetis í öllum regnbogans litum.

Þá er ekið upp í fjöllin til smábæjarins Monte, þar sem við skoðum kirkju staðarins en þaðan er ótrúlegt útsýni yfir borgina. Í lok ferðarinnar gefst farþegum tækifæri á að renna sér niður brekku á tágsleða en það er ekki á hverjum degi sem slíkt tækifæri gefst (athugið sleðaferðin er ekki innifalin í verði / EUR 15.- á mann).

Að lokum er komið við í vínkjallara þar sem farþegum gefst kostur á að bragða hinar ýmsu útgáfur af hinu fræga Madeira víni. 

Dagur 3 – Queimadas – Caldeirao Verde

1. maí / miðvikudagur
Við byrjum daginn á að aka norður til svæðisins „Queimadas“ en þar er umhverfið virkilega fallegt og margvíslegt. Við göngum í 12 km um skógi vaxið svæði og dali og sjáum á leið okkar litla gíga, fossa en einnig til sjós og fjalla.

Gangan tekur u.þ.b. 5 klst. og er talin auðveld til meðalerfið.

Dagur 4 – Prazares – Ponta de Pargo

2. maí / fimmtudagur
Í dag höldum við vestur til „Prazares“. Við ætlum að ganga á milli fjalla og strandar en mikið útsýni er á leiðinni, meðal annars yfir sjávarþorpið „Paúl do Mar“. Gengið er alla leið út á höfðann „Ponta do Pargo“.

Um er að ræða auðvelda göngu þar sem leiðin er slétt en gengnir eru 12 km og tekur gangan um 4 klst.

 

Dagur 5 – Ribeiro Frio

3. maí / föstudagur
Við ökum til Ribeiro Frio sem er í 35 min. aksturfjarlægð frá Funchal. Gangan í dag eru 10 km og tekur u.þ.b. 4 klst. Gengið er með fram árveituskurði í gegnum fallegan gróðurinn og útsýnið er mikið bæði yfir gjár og skógi vaxna dali.

Gangan er talin auðveld til miðlungserfið.

Dagur 6 – Frjáls dagur í Funchal

4. maí / laugardagur
Frjáls dagur í Funchal. Upplagt að nýta tímann og skoða borgina betur. Ef að einhver þarf að taka leigubíl heim, þá eru þeir á hverju strái í miðbænum svo það er auðvelt að koma sér til baka á hótelið.

Dagur 7 – Ponta de Sao Lourenco

5. maí / sunnudagur
Í dag er stefnan tekin eins langt austur og hægt er. Við ökum til sjávarþorpsins Canical (40 mín. akstur) og þaðan ætlum við að ganga eftir tanganum til „Ponta de Sao Louranco“.

Þar sem tanginn er ekki breiður þá sést vel til sjós bæði norðan megin og sunnan megin. Það er skrítið að sjá hvernig brimið kemur með krafti að landi norðan megin en aftur á móti er sjórinn sunnan megin lygndur.

Hér er umhverfið allt öðruvísi en við höfum séð í öðrum göngum um eyjuna, hér er gróðurinn lítill og umhverfið stórbrotið, svört strönd, brim og mikill vindur, svolítið eins og að vera komin heim til Íslands! En sunnan megin á tanganum er lygnt og jafnvel hægt að baða sig í túrkísbláum sjónum.

Gengnir eru 7,2 km, gangan talin meðalerfið en hún tekur u.þ.b. 4 klst.

Dagur 8 – Vereda do Areeiro – Pico Ruivo

6. maí / mánudagur
Eftir góðan morgunverð höldum við af stað í erfiðustu göngu þessarar ferðar. Við ökum norður til Vereda do Areeiro (1 klst. akstur) og þar ætlum við að fara í göngu í fjöllum Madeira.

Gengið er upp á toppinn Pico Ruivo en þegar þangað er komið munum við hvíla okkur og borða nesti. Lengd göngunnar eru 10,5 km (tekur um 4 klst.) en gengið er mikið bæði upp í móti sem sem og niður í móti og er gangan því talin erfið. En erfiðið er vel þess virði því að útsýnið á leiðinni er frábært, sérstaklega ef um er að ræða sólríkan dag.

Þeir sem treysta sér ekki með í þessa göngu geta notið tímans í Funchal.  

Dagur 9 – Rabacal - 25 Fontes

7. maí / þriðjudagur
Við ökum vestur á bóginn til „Rabacal“ (tæplega klst. keyrsla) þar sem við munum ganga í 9 km. um fallegt landslag dala og lárviðarskóga þar sem við munum sjá hveri og marga fallega fossa.

Gangan tekur u.þ.b. 3,15 klst. og er talin auðveld til miðlungserfið.

Dagur 10 – Dvalið í Funchal

8. maí / miðvikudagur
Frjáls dagur í Funchal.

Dagur 11 – Flogið til Íslands

9. maí / fimmtudagur
Við leggjum af stað upp á flugvöll upp úr hádegi.

Flugtími frá Madeira er klukkan 14:45 og komutími í Keflavík kl. 18:40.

Deila núverandi vefslóð með tölvupósti