Sól
Borg
Golfferðir
Sérferðir
Hreyfing
Sigling
Flugsæti

Zagreb - Haust 2019

HAGNÝTAR UPPLÝSINGAR

ALMENNAR UPPLÝSINGAR
Króatía er um 56.500 km² að stærð og íbúafjöldi landins telur rúmar 4 milljónir. Króatía er ríki á Balkanskaga í Suðaustri Evrópu og á landamæri við ein 5 lönd ásamt strönd að Adriahafi. Zagreb er höfuðborg Króatíu og þar búa um 800 þúsund manns.

Zagreb er staðsett í norðvesturhluta Króatíu og stendur meðfram ánni Sava. Zagreb skiptist í þrennt; þúsund ára gamla Gornji grad (efri bæinn), nítjándu aldar gamla Donji grad (neðri bæinn) og svo hið nútímalega Novi Zagreb svæðið (nýja Zagreb). Í Króatíu er móðurmálið króatíska en margir tala einnig ensku, slóvensku og ítölsku.  Í Króatíu er klukkan 2 klst á undan íslenska tímanum frá lok mars til lok októbers – annars er tímamismunur 1 klst frá lok október til lok mars.

VEGABRÉF
ATHUGIÐ í tíma hvort vegabréfið ykkar sé í gildi! Nauðsynlegt er að hafa gilt vegabréf í ferð til Króatíu en Íslendingar þurfa ekki vegabréfsáritun (visum). Ef ekki er hægt að framvísa við innritun á flugvelli, fullgildu og löglegu vegabréfi, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Þann  24.nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki. Farþegar bera einir ábyrgð á því að vegabréf sé gilt og sé viðkomandi meinað að ferðast vegna ófullnægjandi skilríkja, fæst ferðin ekki endurgreidd af hendi ferðaskrifstofunnar. Gott ráð er að hafa meðferðis ljósrit af vegabréfinu. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið. Athugið einnig hvað Schengen vegabréfsáritun varðar að hafa fleiri en "single-entry" áritun ef til stendur að ferðast á milli landa sem eru utan Schengen svæðisins á meðan dvöl stendur.


FLUG & FLUGVÖLLUR
Boðið er uppá beint flug til Zagreb og tekur akstur frá flugvellinum um 40 mín en fer þó eftir umferð. Flugtíminn til Zagreb frá Keflavík er um 4 ½ klst. Mæta þarf til innritunar á flugvöll eigi síðar en 2 klst fyrir áætlaða brottför.


TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upplýsingagjöf, úthluta matarmiðum og jafnvel hótel eftir lengd og eðli seinkanna. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. En við bendum farþegum einnig á að hafa með Evrópska sjúkratryggingakortið með í för,  sem veitir rétt á allri nauðsynlegri heilbrigðisþjónustu á ríkisreknum stofnunum í löndum EES. Nánari upplýsingar má nálgast hjá Sjúkratryggingum Íslands (www.sjukra.is). Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.

Gott er að hafa meðferðis tryggingarkort frá sínu tryggingarfélagi til að flýta fyrir allri afgreiðslu ef eitthvað kemur uppá.

FARANGUR & FARANGURSHEIMILD
Flogið er til Zagreb með flugfélaginu Neos Air, leyfileg hámarksþyngd á innrituðum farangri 20 kg taska á hvern farþega auk 5 kg í handfarangur (hámarks stærð á tösku í handfarangri 55x40x20 cm). Ef farangur skilar sér ekki eða skemmist í flugi verður farþegi að gera skýrslu hjá þjónustuaðila á flugvelli, ef ekki er gerð skýrsla fæst tjónið ekki bætt. Passið vel upp á að gleyma engu um borð í flugvélinni.


GJALDMIÐILL & KREDITKORT
Gjaldmiðillinn í Króatíu er Kuna (HRK). Kuna fæst ekki í bönkum á Íslandi en hægt er að nota Evrur víða. Hraðbankar eru þó á hverju strái þegar út er komið og þar er hægt að taka út Kuna. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400.


SÆTABÓKANIR
Heimsferðir bjóða nú viðskiptavinum sínum upp á að velja sér sæti í flugvélinni, gegn gjaldi í síma 595-1000 eða á skrifstofu Heimsferða. Vinsamlegast athugið að sætabókanir geta breyst án fyrirvara vegna breytinga á flugáætlun eða annarra ófyrirsjáanlegra kringumstæðna. Í slíkum tilfellum er ávallt reynt að útvega viðskiptavini sambærilegt sæti með svipaða staðsetningu í flugvélinni, eins og upphafleg bókun segir til um. Athugið að sætabókanir fást ekki endurgreiddar nema að um verulega tilfærslu hafi verið að ræða. Farþegi þarf þá að framvísa brottfararspjaldi sem sýnir úthlutað sæti á viðkomandi flugi.

Ákveðnar reglur gilda um farþega í hjólastól. Þeir farþegar geta eingöngu bókað sér sæti við glugga. Farþegum með skerta hreyfigetu er ekki heimilt að bóka sæti fyrir miðju eða við gang.

VIÐ KOMU Á ÁFANGASTAÐ
Fararstjóri Heimsferða tekur á móti hópnum á flugvellinum og þeim sem eiga pantaða rútuferð er ekið frá flugvelli að hóteli. Getur sú ferð tekið um 40 mín en fer eftir umferð og á hversu mörg hótel rútan fer. Á leiðinni fer fararstjóri yfir helstu atriði sem að hafa ber í huga, sem og dagskrá kynnisferða o.fl. Ekki er hægt að bóka rútu nema á skrifstofu Heimsferða áður en ferðin hefst. Passið vel upp á að gleyma engu um borð í rútunni.


RÚTUFERÐ TIL & FRÁ FLUGVELLI
Fyrir þá sem eiga pantaða rútuferð til og frá flugvelli, þá er gert ráð fyrir að hver farþegi ferðist með að hámarki 1-2 töskur, auk barnakerru ef við á. Ef ferðast er með annan farangur eins og t.d íþróttabúnað eða rafmagnshjólastóla er ekki öruggt að farangursrými rútunnar sé nægilega stórt til að taka á móti slíkum farangri. Heimsferðir bera ekki ábyrgð á því ef rútan getur ekki heimilað slíkan farangur og því mikilvægt að fá það staðfest áður en ferðast er. Best er að hafa samband við ferðaskrifstofuna og fá nánari upplýsingar fyrir brottför. 


ÞJÓNUSTA Á ÁFANGASTAÐ
Fararstjóri er fulltrúi ferðaskrifstofunnar á staðnum og sinnir farþegum meðan á dvöl þeirra stendur. Ef farþegi telur að eitthvað sé ábótavant varðandi þjónustu hótels eða ónægja er með íbúð/herbergi skal gera fararstjóra og/eða starfsfólki hótelsins viðvart, því ekkert er hægt að gera eftir að heim er komið.

GISTISTAÐIR
Að ölllu jöfnu fer innritun á hótelin fram frá kl. 14.00. Gestir eru vinsamlegast beðnir að kynna sér reglur hótelsins og virða almennar umgengnisreglur, m.a um næturkyrrð. Samkvæmt alþjóðareglum þarf að losa herbergi/íbúð ýmist fyrir hádegi eða á hádegi á brottfarardegi. Ef flug er að kveldi bjóða flest hótel upp á farangursgeymslu þar sem geyma má farangur fram að brottför. Einstaka hótel fer fram á tryggingargjald sem er endurgreitt við brottför ef ekkert tjón hefur orðið á herbergi/íbúð meðan á dvöl stóð.  Hótelin fara venjulega fram á kreditkortanúmer sem tryggingu meðan á dvöl stendur. Ekkert gjald er þó tekið af kortinu. Athugið að frá og með 1.janúar 2019 verður rukkaður ferðamannaskattur í Króatíu. Skatturinn ræðst að stjörnugjöf hótelanna og getur ferðaskrifstofan ekki innheimt þennan skatt fyrir brottför. Skatturinn er gerður upp við lok dvalar og á hótelunum sjálfum.


BROTTFÖR
Þeir sem eiga pantaða rútuferð frá hóteli á flugvöll fá brottfarartíma staðfestan hjá fararstjóra. Þeir sem eru eingöngu bókaðir í flugsæti bera sjálfir ábyrgð á því að fá brottfarartíma staðfestan á flugvelli eða skrifstofu Heimsferða á Íslandi í síma 00354-595-1000.


TAX-FREE
Flestar verslanir bjóða upp á svokallað Tax-Free ef keypt er fyrir ákveðna upphæð í viðkomandi verslun. Verslunin fyllir þá út sérstakt eyðublað sem viðskiptavinir þurfa að fá stimplað hjá tollvörðum á flugvellinum við brottför.  Ath. að þetta er gert fyrir innritun á flugvelli og hafa tollverðir leyfi til þess að óska eftir að sjá varninginn sem verslaður var. Í verslun þarf að framvísa vegabréfi þegar sótt er um Tax-Free.


SÍMI, RAFMAGN & TÖLVUR
Í Króatíu er rafmagnið 220 volt eins og hér á Íslandi. Þegar hringt er úr íslenskum síma frá Króatíu og í íslenskt númer skal setja inn 00354- á undan símanúmerinu. Ef hringja skal úr íslenskum síma í  símanúmer í Króatíu skal setja inn 00385- á undan númerinu. Þá er vert að taka fram að þó að hótelið sem dvalið er á, bjóði aðgang að þráðlausu wi-fi, að þá getur internetsambandið á stundum verið höktandi og ekki á það að treysta að fullu.


DRYKKJARVATN
Í Króatíu er almennt gott vatn, en í öryggisskyni er farþegum ráðlagt að kaupa drykkjarvatn á flöskum. Í miklum hita er ekki gott að drekka ískalt vatn, betra er fyrir magann að fá vatnið í volgara lagi.


VEÐURFAR
Meðalhiti í Króatíu í maí  er um 18-20 gráður en hitinn getur orðið hærri eða lægri eftir tíðarfari.  Ef sólin skín þá mælum við eindregið með notkun sólarvarnar, því sólin getur verið sterk og drekka nóg af vatni.


VERSLANIR & ÚTIMARKAÐIR
Aðal göngugata Zagreb heitir Ilica en þar er fjöldinn allur af verslunum. Bæði eru þar helstu verslunarkeðjur heims en einnig mikið er af vinsælum minni verslunum og ekki gleyma að rölta niður hliðargöturnar en þar má gjarnan finna fallegar verslanir með innlendum varningi.

Vinsælasta verslunarmiðstöð Zagreb er Arena Centar en þar er mikið úrval og verslanir fjölbreyttar. City Center, One West og Avenue Mall eru einnig vinsælar.

Verslunarmiðstöðvarnar eru opnar  frá kl 09.00-21.00 alla daga en opnunartími verslana í gamla bænum getur verið breytilegur.

Vinsælt er að versla antikvörur í Zagreb og eru þessar verslanir víða.

Vinsælasti útimarkaðurinn er Herlic Flea Market en hann er opinn frá kl.07:00 – 14.00, miðvikudag til sunnudags. Þar kennir ýmissa grasa og fá gestir gjarnan gott innlit í menningu Króatíu í gegnum mat og muni. Hér þykir sjálfsögð kurteisi að prútta.

ÞJÓRFÉ
Almennt er þjónustugjald ekki innifalið á veitingastöðum og tíðkast því að gefa um 5% þjórfé. Oftast er einnig gefið þjórfé til leigubílstjóra, burðarmanna og annarra sem veita góða þjónustu.


LÆKNAR & APÓTEK
Góð læknisþjónusta er á staðnum og er hægt að fá enskumælandi lækni heim á hótel með milligöngu fararstjóra.  Íslendingar eru tryggðir innan EES ef um ríkisreknar heilsugæslur og sjúkrastofnanir er að ræða en ekki á einkareknum stofnunum. Mikilvægt er að vera vel tryggður. Opnunartími apóteka er breytilegur en einnig er nætur og helgidagaþjónusta. Leigubílstjórar og starfsfólk í hótelmóttöku vita yfirleitt hvaða apótek er á vakt hverju sinni.


ÍSLENSKUR RÆÐISMAÐUR
Ræðismaður Íslands í Króatíu er staðsettur í Zagreb: Kralja Držislava 8, HR-10000  Zagreb. Sími: (0) 99 2841 511. konzulat@island.hr. Einnig er hægt að hafa samband við íslenska sendiráðið í Berlín sem annast sendiráðsstörfin fyrir Króatíu. Síminn þar er (+49-30) 5050 4000 og netfangið er emb.berlin@mfa.is

ÞJÓFNAÐUR
Líkt og á öðrum ferðamannastöðum, er vasaþjófnaður til staðar. Oft má koma í veg fyrir slíkt með því að vera á varðbergi. Athugið að skilja aldrei við ykkur veski, töskur eða annað verðmætt.


MATUR & SKEMMTUN
Króatía er fræg fyrir fjölbreytta og ljúffenga matargerð, enda landið afar frjósamt. Hér svipar matargerðinni til þeirrar ítölsku, mikið er um fisk, pasta, pizzur og grænmeti, en þó eru töluverð áhrif frá slavneskri og austurrískri eldamennsku. 

Króatar eru stoltir af víngerð sinni, en á Dalmatiu skaganum eru framleidd mörg af frægustu vínum landsins. Helstu bjórtegundir Króata eru Ožujsko og Karlovačko. Fjöldi fallegra veitingastaða er í gamla bænum og við göngugötuna Riva og skemmtilegt er að njóta hinnar einstöku stemningar þar. Einn helsti ferðamáti Króata innan borgarmarkanna er sporvagninn. Auðvelt er að nýta sér þessa sporvagna auk þess sem það er einstaklega hagstætt.


ÁHUGAVERÐIR STAÐIR
Gamli bærinn The Upper Town, gamli hluti borgarinnar er á efra svæði Zagreb og annaðhvort er gengið upp tröppur eða teknir þar til gerðir sporvagnar. Þar kemst ferðamaðurinn í návígi við fallega menningu Zagreb, sögufræga staði og þar trónir efst St. Mark´s kirkjan.

Museum of Broken Relationships, eitt af mörgum söfnum í Zagreb. Þetta safn er með þeim vinsælli að skoða.

Maksimir Park og Zagreb Zoo, grasagarður sem leiðir þig að fallegum dýragarði.

Zagreb Eye, 360° yfirsýn af útsýnispalli. Staðsett í hjarta Zagreb á 16. hæð Zagreb Skyscraper turnsins.

Zagreb Cathedral. Dómkirkjan í Zagreb er ein sú tilkomumesta sem þú sérð, byggð í gotneskum stíl. Þetta er hæsta bygging Króatíu.

Kravata, mikið sótt verslun í gamla bænum sem selur hálstau. Þess má geta að bindið á uppruna sinn í Króatíu.

Deila núverandi vefslóð með tölvupósti