Sól
Borg
Golfferðir
Sérferðir
Hreyfing
Sigling
Flugsæti

Vín - Haust 2019

HAGNÝTAR UPPLÝSINGAR

ALMENNAR UPPLÝSINGAR
Austurríki er tæpl. 84.000 ferkm. að stærð, það er lýðveldi og þar búa um 8,4 milljónir manna, þar af um 1,7 millj. í höfuðborginni Vín sem er í austurhluta landsins. Í Austurríki er töluð þýska en margir skilja og tala ensku. Í Austurríki er klukkan 2 klst á undan íslenska tímanum frá lok mars til lok októbers – annars er tímamismunur 1 klst frá lok október til lok mars..


VEGABRÉF
Nauðsynlegt er að hafa gilt vegabréf í ferð til Austurríkis eins og til annarra landa. Ef ekki er hægt að sýna við innritun á flugvelli, fullgilt og löglegt vegabréf, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Ekki er hægt að fá framlengingu á vegabréfi úti á flugvelli í Keflavík. Gott ráð er að athuga í tíma hvort vegabréf þitt sé enn í gildi og einnig er gott að ferðast með ljósrit af vegabréfi þínu. Þann 24.nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki. Farþegar bera algjörlega einir ábyrgð á því að vegabréf sé gilt og sé viðkomandi meinað að ferðast vegna ófullnægjandi skilríkja, fæst ferðin ekki endurgreidd af hendi ferðaskrifstofunnar. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið.


FLUG & FLUGVÖLLUR
Flogið er til Bratislava en flugvöllurinn þar heitir M. R. Štefánik Airport. Flugtíminn til Bratislava frá Keflavík er um 4 klst. Mæta þarf til innritunar á flugvöll eigi síðar en 2 klst fyrir áætlaða brottför.


TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upplýsingagjöf, úthluta matarmiðum og jafnvel hótel eftir lengd og eðli seinkanna. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. En við bendum farþegum einnig á að hafa með Evrópska sjúkratryggingakortið með í för, sem veitir rétt á allri nauðsynlegri heilbrigðisþjónustu á ríkisreknum stofnunum í löndum EES. Nánari upplýsingar má nálgast hjá Sjúkratryggingum Íslands (www.sjukra.is). Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.


FARANGUR & FARANGURSHEIMILD
Flogið er með flugfélaginu Smart Wings (ex. Travel Service) og er leyfileg hámarksþyngd á innrituðum farangri 20kg á hvern farþega auk 5kg í handfarangur (hámark stærð á tösku í handfarangri er 56x45x25 cm). Ef farangur skilar sér ekki eða skemmist í flugi verður farþegi að gera skýrslu hjá þjónustuaðila á flugvelli, ef ekki er gerð skýrsla fæst tjónið ekki bætt. Passið vel upp á að gleyma engu um borð í flugvélinni.


GJALDMIÐILL & KREDITKORT
Gjaldmiðillinn í Austurríki er Evra (EUR). Athugið að almennt er ekki hægt að nota annan gjaldmiðil í verslunum, en hægt er að skipta öðrum gjaldmiðlum í bönkum. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400.


VIÐ KOMU Á ÁFANGASTAÐ
Fararstjórar Heimsferða taka á móti hópnum á flugvellinum og þeim sem eiga pantaða rútuferð er ekið frá flugvelli að hóteli. Tekur sú ferð um 1,5 klst en fer dálítið eftir umferð. Passið vel upp á að gleyma engu um borð í rútunni.


ÞJÓNUSTA FARARSTJÓRA
Fararstjórar eru fulltrúar ferðaskrifstofunnar á staðnum, en verða staðsettir í Bratislava. Hægt er að ná í fararstjóra í þjónustusímann þeirra á milli kl 10-17 eða í neyðarsímann sem er opinn allan sólarhringinn, ef um neyðartilfelli er að ræða. Ef farþegi telur að eitthvað sé ábótavant varðandi þjónustu hótels eða ónægja er með íbúð/herbergi skal gera starfsfólki hótelsins viðvart eða fararstjóra, því ekkert er hægt að gera eftir að heim er komið.


GISTISTAÐIR
Gestir eru vinsamlegast beðnir að kynnar sér reglur hótelsins og virða almennar umgengnisreglur, m.a um næturkyrrð. Samkvæmt alþjóðareglum þarf að losa herbergi/íbúð ýmist fyrir hádegi eða á hádegi á brottfarardegi. Einstaka hótel fer fram á tryggingargjald sem er endurgreitt við brottför ef ekkert tjón hefur orðið á herbergi/íbúð meðan á dvöl stóð. Þá getur hótelið farið fram á kreditkortanúmer sem tryggingu meðan á dvöl stendur.


SÍMI, RAFMAGN & TÖLVUR
Í Austurríki er rafmagnið 220 volt eins og hér á Íslandi. Þegar hringt er úr íslenskum síma frá Austurríki og í íslenskt númer skal setja inn 00354- á undan símanúmerinu. Ef hringja skal úr íslenskum síma í austurríkst númer skal setja inn 0043- á undan númerinu. Þá er vert að taka fram að þó að hótelið sem dvalið er á, bjóði aðgang að þráðlausu wi-fi, að þá getur internetsambandið á stundum verið höktandi og ekki á það að treysta að fullu.


DRYKKJARVATN
Í Austurríki er almennt gott vatn, en í öryggisskyni er farþegum ráðlagt að kaupa drykkjarvatn á flöskum. Í miklum hita er ekki gott að drekka ískalt vatn, betra er fyrir magann að fá vatnið í volgara lagi.


BROTTFÖR
Þeir sem eiga pantaða rútuferð frá hóteli á flugvöll fá brottfarartíma staðfestann í hótelmóttöku eða hjá fararstjóra. Farþegar þurfa að skrá sig út af herbergjum fyrir eða um hádegi á brottfarardegi. Hótelmóttakan sér um að geyma farangur fram að brottför ef á þarf að halda.


VEÐURFAR
Meðalhiti í Vínarborg í september er um 15° en hitinn getur orðið hærri eða lægri eftir tíðarfari. Athugið að hitastigið getur farið niður í 10°að kvöldlagi. Mælt er með þægilegum fatnaði, góðum götuskóm og alltaf gott að hafa regnhlíf við hendina.


VERSLANIR
Aðalverslunargöturnar í miðbænum eru Mariahilferstrasse og Kärtnerstrasse út frá Stefánskirkjunni. Verslanir eru yfirleitt opnar kl 8:30 -18.00 mánudaga til föstudaga og kl 9:00 – 17:00 á laugardögum. Á sunnudögum eru flestar verslanir lokaðar.


TAX-FREE
Flestar verslanir bjóða upp á svokallað Tax-Free ef keypt er fyrir ákveðna upphæð í viðkomandi verslun. Verslunin fyllir þá út sérstakt eyðublað sem viðskiptavinir þurfa að fá stimplað hjá tollvörðum á flugvellinum við brottför. Ath. að þetta er gert fyrir innritun á flugvelli og hafa tollverðir leyfi til þess að óska eftir að sjá varninginn sem verslaður var. Í verslun þarf að framvísa vegabréfi þegar sótt er um Tax-Free.


ALMENNINGS SAMGÖNGUR
Mjög gott almennings samgangnakerfi er í borginni. Þrjár neðanjarðarlínur, sporvagnar og strætisvagnar. Nánar á hótelum og hjá fararstjóra.


ÞJÓRFÉ
Að öllu jöfnu er þjónustugjald innifalið í veitingahúsareikningum í Austurríki, en það tíðkast mjög víða að “rúnna af” tölur eða gefa 5-10 % fyrir góða þjónustu á veitingahúsum.


LÆKNAR
Góð læknisþjónusta er í Vínarborg og er hægt að komast í samband við enskumælandi lækni með milligöngu hótelmóttöku.


ÍSLENSKT SENDIRÁÐ
Íslenskt sendiráð er í Vínarborg, Skrifstofa: Naglergasse 2/3/8, AT-1010 Wien, Sími: (01) 533 2771 / 72 Netfang: www.iceland.is/iceland-abroad/at - opið frá kl. 09:00 - 16:00 virka daga.


VEITINGAR & SKEMMTUN
Fjöldi veitingastaða og bara er í borginni og Vínar kaffihúsin eru víðfræg. “Heurigen” staðir með vínum þessa árs eru líka einkennandi fyrir Vín. Bjórstaðir, næturklúbbar og diskótek eru víða og allir ættu að finna eitthvað við sitt hæfi í þessari lifandi heimsborg. 

Nánari upplýsingar á hótelum, á http://www.wien.info eða hjá fararstjóra.

TÓNLEIKAR & MENNINGARLÍF
Vínarborg er háborg tónlistar og menningarlíf af öllu tagi blómstrar í borginni. Óperuhúsin eru heims-þekkt og Vínardrengjakórinn kannast allir við. Þarna eru víðfræg söfn og fallegar byggingar og svona mætti lengi telja.

Vefslóðir þekktustu tónleikahúsanna:
Wiener Staatsoper: www.wiener-staatsoper.at
Volksoper Wien: www.volksoper.at
Kammeroper: www.wienerkammeroper.at

VEFSLÓÐIR UM VÍNARBORG
http://info.wien.at
http://www.magwien.gv.at/english/tourism.htm

Deila núverandi vefslóð með tölvupósti