Sól
Borg
Golfferðir
Sérferðir
Hreyfing
Sigling
Flugsæti

Valencia - Haust 2019

HAGNÝTAR UPPLÝSINGAR

ALMENNAR UPPLÝSINGAR
Spánn er um 504.600 km² að stærð og íbúafjöldi landins telur rúmar 46 milljónir, þar af búa tæplega 900 þúsund í Valencia sem er þriðja stærsta borg Spánar.  Í Valencia er móðurmálið spænska og hana tala auðvitað allir, margir skilja og tala ensku sérstaklega á veitingastöðum, en á stundum skilur fólk í verslunum litla sem enga ensku og þá er bara að grípa til látbragðsins. Á Spáni er klukkan tveimur tímum á undan íslenska tímanum frá lok mars til lok októbers – annars er tímamismunur einn tími frá lok október til lok mars.


VEGABRÉF
Nauðsynlegt er að hafa gilt vegabréf í ferð til Spánar eins og til annarra landa. Ef ekki er hægt að sýna við innritun á flugvelli, fullgilt og löglegt vegabréf, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Ekki er hægt að fá framlengingu á vegabréfi úti á flugvelli í Keflavík.  

Gott ráð er að athuga í tíma hvort vegabréf þitt sé enn í gildi og einnig er gott að ferðast með ljósrit af vegabréfi þínu. Þann  24.nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki. Farþegar bera algjörlega einir ábyrgð á því að vegabréf sé gilt og sé viðkomandi meinað að ferðast vegna ófullnægjandi skilríkja, fæst ferðin ekki endurgreidd af hendi ferðaskrifstofunnar. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið.

FLUG & FLUGVÖLLUR
Flugvöllurinn heitir Valencia airport en er einnig þekktur sem Manises Airport. Flugtíminn til Valencia frá Keflavík er um 4 tímar og 20 mínútur. Mæta þarf til innritunar á flugvöll eigi síðar en tveimur tímum fyrir áætlaða brottför.


TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upllýsingagjöf, úthluta matarmiðum og jafnvel hótel eftir lengd og eðli seinkanna. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. En við bendum farþegum einnig á að hafa með Evrópska sjúkratryggingakortið með í för, sem veitir rétt á allri nauðsynlegri heilbrigðisþjónustu á ríkisreknum stofnunum í löndum EES. Nánari upplýsingar má nálgast hjá Sjúkratryggingum Íslands (www.sjukra.is). Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.


FARANGUR & FARANGURSHEIMILD
Flogið er með flugfélaginu Neos Air og er leyfileg hámarks þyngd á innrituðum farangri er 20kg á hvern farþega auk 5kg í handfarangur. Ef farangur skilar sér ekki eða skemmist í flugi verður farþegi að gera skýrslu um málið hjá þjónustuaðila á flugvelli, ef ekki er gerð skýrsla fæst tjónið einfaldlega ekki bætt. Passið vel upp á að gleyma engu um borð í flugvélinni.

GJALDMIÐILL & KREDITKORT
Gjaldmiðillinn á Spáni er Evra (EUR). Athugið að almennt er ekki hægt að nota annan gjaldmiðil í verslunum, en hægt er að skipta öðrum gjaldmiðlum í bönkum. Nánari upplýsingar um gjaldmiðla gagnvart íslensku krónunni má finna á vefsíðunni www.oanda.com. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400.


VIÐ KOMU
Fararstjórar Heimsferða taka á móti hópnum á flugvellinum og þeim sem eiga pantaða rútuferð er ekið frá flugvelli að hóteli. Tekur sú ferð um 30 mínútur en fer dálítið eftir umferð og á hversu mörg hótel rútan fer. Á leiðinni fara fararstjórar yfir helstu atriði sem að hafa ber í huga, sem og dagskrá skoðunarferða o. fl. Ekki er hægt að bóka rútu nema á skrifstofu Heimsferða áður en ferðin hefst. Passið vel upp á að gleyma engu um borð í rútunni.


RÚTUFERÐ TIL & FRÁ FLUGVELLI
Fyrir þá sem eiga pantaða rútuferð til og frá flugvelli, þá er gert ráð fyrir að hver farþegi ferðist með að hámarki 1-2 töskur, auk barnakerru ef við á. Ef ferðast er með annan farangur eins og t.d íþróttabúnað eða rafmagnshjólastóla er ekki öruggt að farangursrými rútunnar sé nægilega stórt til að taka á móti slíkum farangri. Heimsferðir bera ekki ábyrgð á því ef rútan getur ekki heimilað slíkan farangur og því mikilvægt að fá það staðfest áður en ferðast er. Best er að hafa samband við ferðaskrifstofuna og fá nánari upplýsingar fyrir brottför.


ÞJÓNUSTA Á ÁFANGASTAÐ
Fararstjórar eru fulltrúar ferðaskrifstofunnar á staðnum og sinna farþegum meðan á dvöl þeirra stendur. Ef eitthvað er að varðandi þjónustu hótels eða ónægja með íbúð/herbergi skal gera farastjóra og/eða starfsfólki hótelsins viðvart, því ekkert er hægt að gera eftir að heim er komið.


GISTISTAÐIR
Gestir eru vinsamlegast beðnir að kynna sér reglur hótelsins og virða almennar umgengnisreglur, m.a um næturkyrrð. Samkvæmt alþjóðareglum þarf að losa herbergi/íbúð ýmist fyrir hádegi eða á hádegi á brottfarardegi. Ef flug er að kveldi bjóða hótel upp á farangursgeymslu þar sem geyma má farangur að brottför. Einstaka hótel fer fram á tryggingargjald sem er endurgreitt við brottför ef ekkert tjón hefur orðið á herbergi/íbúð meðan á dvöl stóð. Þá getur hótelið farið fram á kreditkortanúmer sem tryggingu meðan á dvöl stendur.


BROTTFÖR
Þeir sem eiga pantaða rútuferð frá hóteli á flugvöll fá brottfarartíma staðfestan hjá fararstjóra. Einnig má sjá brottfaratíma frá hóteli á dagskrárblöðum sem farþegar fá afhent um borð í flugvélinni á leið út. Farþegar þurfa að skrá sig út af herbergjum fyrir eða um hádegi á brottfarardegi. Hótelmóttakan sér um að geyma farangur fram að brottför ef á þarf að halda. Þeir sem eru eingöngu bókaðir í flugsæti bera sjálfir ábyrgð á því að fá brottfarartíma staðfestan á flugvelli eða skrifstofu Heimsferða á Íslandi í síma 00354-595-1000.


FERÐAMANNASKATTUR
Þann 1. nóvember 2012 var settur á ferðamannaskattur í Valencia. Skattinn þurfa ferðamenn að greiða sjálfir á viðkomandi hóteli. Upphæðin er: 0,50 EUR á mann á dag á 3* hótelum - 1 EUR á mann á dag á 4* hótelum - 2,50 EUR á mann á dag á 5* hótelum. Ferðaskrifstofur geta ekki innheimt skattinn.

SÍMI, RAFMAGN, TÖLVUR
Á Spáni er rafmagnið 220 volt eins og hér á Íslandi. Þegar hringt er úr íslenskum síma frá Spáni og í íslenskt númer skal setja inn 00354- á undan símanúmerinu. Ef hringja skal úr íslenskum síma í spænskt númer skal setja inn 0034- á undan númerinu. Þá er vert að taka fram að þó að hótelið sem dvalið er á, bjóði aðgang að þráðlausu wi-fi, að þá getur internetsambandið á stundum verið höktandi og ekki á það að treysta að fullu.


DRYKKJARVATN
Á Spáni er almennt gott vatn, en í öryggisskyni er farþegum ráðlagt að kaupa drykkjarvatn á flöskum. Í miklum hita er ekki gott að drekka ískalt vatn, betra er fyrir magann að fá vatnið í volgara lagi.


VEÐURFAR
Meðalhiti í Valencia í október er um 20-24 gráður en hitinn getur orðið hærri eða lægri eftir tíðarfari. Oft er mikill raki í borginni og því gott að drekka nóg af vatni. Ef sólin skín að þá mælum við eindregið með því að borin sé á sig sólarvörn, því sólin getur verið mjög sterk hér.


VERSLANIR
Verslanir eru almennt opnar frá 10-22 mán.-fös. og laugard. kl. 10–14. Smærri verslanir og fyrirtæki hafa þá venju að hafa lokað milli kl 14-16, en undantekningar eru á þessu á þeim svæðum sem mest eru sótt af ferðamönnum. 

Aðalverslunargatan heitir Colón en þar má finna öll helstu vörumerki s.s. H&M, Zara, Mango, Berskha og fleiri verslanir.
Aðrar og dýrari merkjavörur eru aðallega á Poeta Querol. Stórar verslunarmiðstöðvar opna yfirleitt kl. 10:00 – 22:00 alla daga og til kl 21:00 á sunnudögum. Helstu verslunarmiðstoðvar í Valencia eru staðsettar í námunda við City of Art& Science:

Centro Comercial Aqua, http://aqua-multiespacio.com/

Centro Comercial El Saler, http://www.elsaler.com/

TAX FREE
Flestar verslanir bjóða upp á svokallað Tax-free ef keypt er fyrir ákveðna upphæð í viðkomandi verslun. Verslunin fyllir þá út sérstakt eyðublað sem viðskiptavinir þurfa að fá stimplað hjá tollvörðum á flugvellinum við brottför.  ATH. að þetta er gert fyrir innritun á flugvelli og hafa tollverðir leyfi til þess að óska eftir að sjá varninginn sem verslaður var. Í verslun þarf að framvísa vegabréfi þegar sótt er um tax-free.


ÞJÓRFÉ
Almennt er þjónustugjald ekki innifalið á veitingastöðum og tíðkast því að gefa um 10% þjórfé. Oftast er einnig gefið þjórfé á hárgreiðslustofum, snyrtistofum, til leigubílstjóra, burðarmanna og annarra sem veita góða þjónustu.


SAMGÖNGUR
Almenningssamgöngur í Valencia eru aðgengilegar og auðveldar í notkun fyrir ferðamenn. Hægt er að nýta sér strætisvagnakerfi, lestarkerfi (metró)  og leigubíla, sem að eru á hverju strái. Miðar eru seldir á neðanjarðarstöðvum, í tóbaksbúðum og söluturnum en yfirleitt ekki í farartækjunum sjálfum, nema ef um lengri leiðir sé að ræða. Hagstæðast er að kaupa rafrænt dagkort sem auðvelt er að fylla inn á. Hafa ber í huga að sektað er fyrir að ferðast miðalaus.

Nokkrar leigubílastöðvar eru starfandi í borginni og allir leigubílar sem hafa starfsleyfi i borginni hafa gjaldmæli, en ágæt venja er að spyrja um verð áður en haldið er af stað. Nokkrar stoppistöðvar eru við aðaltorgin í miðbænum en einnig er hægt að biðja hótelmóttökuna um að hringja á leigubíl. Þá er upplagt að leigja sér hjól, enda góðir hjólastígar um alla borgina.

LÆKNAR & APÓTEK
Ágætis læknisþjónusta er í Valencia og er hægt að fá lækni heim á hótel með milligöngu hótelmóttöku eða fararstjóra. 

Apótek eru opin frá 10:00-14:00 og 17:30-20:00 mánud. - föstud. Nokkur apótek (farmacia) eru á vakt 24 klst. Hótelafgreiðslur og leigubílstjórar vita flest hvaða apótek er á vakt.

ÍSLENSKUR RÆÐISMAÐUR
Luis Miralles Ferrer er ræðismaður í Valencia. Heimilisfang skrifstofu: Plaza Porta de la Mar, ES-46004 Valencia og síminn er: 0034(96) 3517275 og netfangið er: ignaciomiralles@yahoo.com

ÞJÓFNAÐUR
Líkt og í öðrum stórborgum, er nokkuð um vasaþjófnað í borginni. Oft má koma í veg fyrir slíkt með því að vera vel  á varðbergi. Athugið að skilja aldrei við ykkur veski, töskur eða annað verðmætt.


MATUR & SKEMMTUN
Fjöldi góðra veitingastaða er að finna í Valencia og er borgin þekkt fyrir mikla matarmenningu. Tapasbarir eru á hverju götuhorni, sjávarréttastaðir með mikið úrval af góðum sjávarréttum eins og m.a. „Paella“ sem kemur upprunalega frá Valencia og er þeirra stolt, og alþjóðlegir veitingastaðir sem setja sinn svip á borgina. Oftar en ekki eru veitingastaðirnar staðsettir inn í litlum þröngum götum í miðbænum og eru þéttsetnir af bæði ferðamönnum og heimamönnum. Þeir eru mjög stoltir af afurðum svæðisinsi og er þjóðardrykkur Valencia „ jarðhneturdrykkurinn Horchata“ og kokteilinn „Aqua Valencia“ ekki undanskilin þar.


ÁHUGAVERÐIR STAÐIR
Barrio del Carmen
Camen hverfið þar sem þú finnur Torres turnana, Serrano hliðið sem er forn aðalinngangur inn í borgina, voru áður 12 talsins.

Plaza de la Virgen
Torgið er hjarta miðborgarinnar og þar er Dómkirkjan Valencia Cathedral en þar er að finna heilagan kaleik, Micalet turninn, Ráðhúsið, gamli bærinn og gotneskur arkitektúr og kaffihús!

Plaza del Mercado
Miðbæjarmarkaðurinn Mercado central ásamt Lonja de la Seda, gamla silkimarkaðinum og Snatos Juanes kirkjunni sem er falleg að innan.

Plaza del Ayuntamiento
Í náumunda við Ráðhústorgið finnur þú Plaza del Toros, nautaatshringinn sem var byggður 1850, ráðhúsið og fleiri fallegar byggingar. Ef þið hafið áhuga og/eða tíma þá gætuð þið athugað hvort að það sé "corrida" eða at í hringnum þessa daga.

Marina de Juan Carlos 1
Við höfn Valencia er tilvalið að borða paella á sjávarréttastað en þær eru mjög góðar þar, skoða helstu kennileiti hafnarinnar eins og: Edificio del Reloj og Veles e Vents. Þar eru líka verslanir og skemmtilegur garður/leiksvæði. Við höfnina eru oft haldnar tónlistarhátiðir og annað sem tengist menningu og listum.

Turia garðurinn
Garðurinn er byggður á gamla árfarvegi árinnar Turia sem áður skipti borginni í tvennt.  Það er gaman að leigja hjól og hjóla um garðinn sem er um 9 km, moka sand á Golíat leikvellinum og enda túrinn í "borg lista og vísinda/City of Arts and Science" sem er við enda Turia garðsins.

Borg lista og vísinda
Klasinn bygginga sem var hannaður af Santiago Calatrava en þar eru söfnin/salir nefnd eftir meðlimum konungsfjölskyldunnar og eru mjög fjölbreyttir. Ekki sleppa því að heimsækja sædýrasafnið Oceanográfic en það er stærsta og flottasta sædýrasafn í Evrópu!


GOLF
Það eru fimm golfvellir í Valencia og enn fleiri vellir í næsta nágrenni við borgina.  Einn sá besti heitir El Saler og er skráður sem einn af topp 100 bestu golfvöllum í heimi: http://www.top100golfcourses.co.uk/htmlsite/productdetails.asp?id=534

Upplýsingar um golfvelli í Valencia og nágrenni: http://en.comunitatvalenciana.com/what-to-do/valencia/golf

Club de Golf El Saler (hannaður af Javier Arana): http://www.parador.es/en/offers/normal/parador-de-el-saler-golf-package sími (0034) 961 610 384. Unnt er að leigja golfsett á flestum golfvöllunum.

Deila núverandi vefslóð með tölvupósti