Sól
Borg
Golfferðir
Sérferðir
Hreyfing
Sigling
Flugsæti

Ljubljana - Haust 2019

HAGNÝTAR UPPLÝSINGAR

ALMENNAR UPPLÝSINGAR
Slóvenía er rúmlega 20.000 ferkm. að stærð, það er lýðveldi og þar búa um 2 milljónir manna,  þar af um 300 þúsund í höfuðborginni Ljubljana. Í Slóveníu eru töluð slóvenska en margir skilja og tala ensku. Í Slóveníu er klukkan 2 klst á undan íslenska tímanum frá lok mars til lok októbers – annars er tímamismunur 1 klst frá lok október til lok mars. Slóvenía hefur verið í Evrópusambandinu frá því í maí 2004. 

 

VEGABRÉF
Nauðsynlegt er að hafa gilt vegabréf í ferð til Slóveníu eins og til annarra landa. Ef ekki er hægt að sýna við innritun á flugvelli, fullgilt og löglegt vegabréf, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Ekki er hægt að fá framlengingu á vegabréfi úti á flugvelli í Keflavík. Gott ráð er að athuga í tíma hvort vegabréf þitt sé enn í gildi og einnig er gott að ferðast með ljósrit af vegabréfi þínu. Þann  24.nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki. Farþegar bera algjörlega einir ábyrgð á því að vegabréf sé gilt og sé viðkomandi meinað að ferðast vegna ófullnægjandi skilríkja, fæst ferðin ekki endurgreidd af hendi ferðaskrifstofunnar. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið.


FLUG & FLUGVÖLLUR
Flugfélagið heitir Adria Airways og notar Airbus 320 vél fyrir okkar farþega. Flugvöllurinn í Ljubljana heitir Ljubljana Joze Pucnik Airport og er flugtíminn frá Keflavík um 4 ½ klst. Mæta þarf til innritunar á flugvöll eigi síðar en 2 klst fyrir áætlaða brottför.


TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upplýsingagjöf, úthluta matarmiðum og jafnvel hótel eftir lengd og eðli seinkanna. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. En við bendum farþegum einnig á að hafa með Evrópska sjúkratryggingakortið með í för,  sem veitir rétt á allri nauðsynlegri heilbrigðisþjónustu á ríkisreknum stofnunum í löndum EES. Nánari upplýsingar má nálgast hjá Sjúkratryggingum Íslands (www.sjukra.is). Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.


FARANGUR & FARANGURSHEIMILD
Flogið er með Adria Airways og er leyfileg hámarksþyngd á innrituðum farangri 20kg á hvern farþega auk 5kg í handfarangur. Ef farangur skilar sér ekki eða skemmist í flugi verður farþegi að gera skýrslu hjá þjónustuaðila á flugvelli, ef ekki er gerð skýrsla fæst tjónið ekki bætt. Passið vel upp á að gleyma engu um borð í flugvélinni.


GJALDMIÐILL & KREDITKORT
Gjaldmiðillinn í Slóveníu er Evra (EUR). Athugið að almennt er ekki hægt að nota annan gjaldmiðil í verslunum, en hægt er að skipta öðrum gjaldmiðlum í bönkum. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400.


VIÐ KOMU Á ÁFANGASTAÐ
Fararstjórar Heimsferða taka á móti hópnum á flugvellinum og þeim sem eiga pantaða rútuferð er ekið frá flugvelli að hóteli. Tekur sú ferð um 30 mínútur en fer dálítið eftir umferð og á hversu mörg hótel rútan fer. Á leiðinni fara fararstjórar yfir helstu atriði sem að hafa ber í huga, sem og dagskrá kynnisferða o.fl. Ekki er hægt að bóka rútu nema á skrifstofu Heimsferða áður en ferðin hefst. Passið vel upp á að gleyma engu um borð í rútunni.


RÚTUFERÐ TIL & FRÁ FLUGVELLI
Fyrir þá sem eiga pantaða rútuferð til og frá flugvelli, þá er gert ráð fyrir að hver farþegi ferðist með að hámarki 1-2 töskur, auk barnakerru ef við á. Ef ferðast er með annan farangur eins og t.d íþróttabúnað eða rafmagnshjólastóla er ekki öruggt að farangursrými rútunnar sé nægilega stórt til að taka á móti slíkum farangri. Heimsferðir bera ekki ábyrgð á því ef rútan getur ekki heimilað slíkan farangur og því mikilvægt að fá það staðfest áður en ferðast er. Best er að hafa samband við ferðaskrifstofuna og fá nánari upplýsingar fyrir brottför.


ÞJÓNUSTA Á ÁFANGASTAÐ
Fararstjórar eru fulltrúar ferðaskrifstofunnar á staðnum og sinna farþegum meðan á dvöl þeirra stendur. Ef farþegi telur að eitthvað sé ábótavant varðandi þjónustu hótels eða ónægja er með íbúð/herbergi skal gera farastjóra og/eða starfsfólki hótelsins viðvart, því ekkert er hægt að gera eftir að heim er komið.


GISTISTAÐIR
Gestir eru vinsamlegast beðnir að kynnar sér reglur hótelsins og virða almennar umgengnisreglur, m.a um næturkyrrð. Samkvæmt alþjóðareglum þarf að losa herbergi/íbúð ýmist fyrir hádegi eða á hádegi á brottfarardegi. Einstaka hótel fer fram á tryggingargjald sem er endurgreitt við brottför ef ekkert tjón hefur orðið á herbergi/íbúð meðan á dvöl stóð. Þá getur hótelið farið fram á kreditkortanúmer sem tryggingu meðan á dvöl stendur.


BROTTFÖR
Þeir sem eiga pantaða rútuferð frá hóteli á flugvöll fá brottfarartíma staðfestan hjá fararstjóra. Einnig má sjá brottfaratíma frá hóteli á dagskrárblöðum sem farþegar hafa fengið sent í tölvupósti. Farþegar þurfa að skrá sig út af herbergjum fyrir eða um hádegi á brottfarardegi. Hótelmóttakan sér um að geyma farangur fram að brottför ef á þarf að halda. Þeir sem eru eingöngu bókaðir í flugsæti bera sjálfir ábyrgð á því að fá brottfarartíma staðfestan á flugvelli eða skrifstofu Heimsferða á Íslandi í síma 00354-595-1000.


SÍMI, RAFMAGN & TÖLVUR
Í Slóveníu er rafmagnið 220 volt eins og hér á Íslandi. Þegar hringt er úr íslenskum síma frá Slóveníu og í íslenskt númer skal setja inn 00354- á undan símanúmerinu. Ef hringja skal úr íslenskum síma í slóvenskt númer skal setja inn 00386- á undan númerinu. Þá er vert að taka fram að þó að hótelið sem dvalið er á, bjóði aðgang að þráðlausu wi-fi, að þá getur internetsambandið á stundum verið höktandi og ekki á það að treysta að fullu.


DRYKKJARVATN
Í Slóveníu er almennt gott vatn, en í öryggisskyni er farþegum ráðlagt að kaupa drykkjarvatn á flöskum. Í miklum hita er ekki gott að drekka ískalt vatn, betra er fyrir magann að fá vatnið í volgara lagi.


VEÐURFAR
Meðalhiti í Slóveníu í október er um 12° en hitinn getur orðið hærri eða lægri eftir tíðarfari.  Athugið að hitastigið getur farið niður fyrir 8° að kvöldlagi.  Mælt er með þægilegum fatnaði, góðum götuskóm og alltaf gott að hafa regnhlíf við hendina.

VERSLANIR
Það er gott að versla í Ljubljana og eiga þeir eina stærstu verslunarmiðstöð í Slóveníu; BTC City, sem er  staðsett rétt fyrir utan borgina en þar má finna yfir 450 verslanir. Fleiri verslunarmiðstöðvar eru eins og City Park og Emporium (outlet). Einnig eru ýmsar verslanir í miðbænum. Um helgar eru skemmtilegir markaðir staðsettir meðfram ánni sem hægt er að gera góð kaup á ýmsum varningi.  Verslanir eru yfirleitt opnar frá kl 8:00 -19.00 mánudaga til föstudaga og kl  8:00 – 13:00 á laugardögum, þó gætu verslanir í BTC City verið opnar lengur. Flestar verslanir eru lokaðar á sunnudögum.


TAX-FREE
Margar verslanir bjóða „Tax free“ fyrir þá sem ekki eru í Evrópusambandinu. Ef verslað er fyrir lágmarksupphæð í einni verslun er hægt að biðja um TAX FREE (viðskipti án virðisaukaskatts). Hafið vegabréf meðferðis (eða ljósrit). Verslunin þarf að fylla út viðkomandi form, sem oftast er frá „GLOBAL BLUE”, hvað keypt var, hvenær og fyrir hvaða upphæð. Kvittun frá versluninni þarf að fylgja með. Síðan skrifið þið sjálf nafnið ykkar á miðann, heimilisfang á Íslandi og vegabréfsnúmer. Áður en farið er úr landi þarf að láta stimpla þessa miða til að hægt sé að fá virðisaukaskattinn endurgreiddan. Það er gert á flugvellinum en þar er svo hægt að fá virðisaukaskattinn endurgreiddan í „Refund counter“ í brottfararsalnum.

ÞJÓRFÉ
Ekki er nauðsynlegt að gefa þjórfé í Slóveníu, en flestir gefa þó eitthvað fyrir góða þjónustu á veitingastöðum, börum, hótelum, til bílstjóra í kynnisferðum og víðar, ca 5 – 10% ef þeir eru ánægðir með þjónustuna.


SAMGÖNGUR
Þrátt fyrir að mjög auðvelt sé að komast fótgangandi á milli staða er mjög gott almennings samgangnakerfi í borginni. Þetta eru sporvagnar, strætisvagnar og leigubílar sem auðvelt er að ná til.  Nánar á hótelum og hjá fararstjóra. 


LÆKNAR
Góð læknisþjónusta er í Ljubljana og apótek eru víða. Hægt að komast í samband við enskumælandi lækni með milligöngu hótelmóttöku eða fararstjóra.


ÍSLENSKUR RÆÐISMAÐUR
Íslenskur ræðismaður er í Ljubljana: Vladimir Luznic, skrifstofa: Presernova 15, SI-1000 Ljubljana, sími: (1) 251 8835, netfang: info@iceland.si. Sendiráðið í Vínarborg annast sendiráðsstörfin fyrir Ljubljana. Sendiherra í Vín er Auðunn Atlason, s. +43-1 533 2771, netfang : emb.vienna@mfa.isa

VEITINGAR OG SKEMMTUN
Fjöldi góðra veitingastaða er í Ljubliana og gestir munu ekki eiga erfitt með að finna “rétta” staðinn. Hægt er að skoða alla helstu veitingastaði Ljubliana inn á þessari vefsíðu: http://www.ljubljana.info/restaurants eða hjá fararstjóra.


VEFSLÓÐIR UM LJUBLJANA
http://www.visitljubljana.com/
http://www.ljubljana.si/en/

Deila núverandi vefslóð með tölvupósti