Sól
Borg
Golfferðir
Sérferðir
Hreyfing
Sigling
Flugsæti

Gran Canaria - Vetur 2019/2019

HAGNÝTAR UPPLÝSINGAR

FYRIR BROTTFÖR
Nauðsynlegt er að hafa gilt vegabréf í ferð til Gran Canaria eins og til annarra landa. Ef ekki er hægt að sýna við innritun á flugvelli, fullgilt og löglegt vegabréf, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Ekki er hægt að fá framlengingu á vegabréfi úti á flugvelli í Keflavík.  Gott ráð er að athuga í tíma hvort vegabréf þitt sé enn í gildi og einnig er gott að ferðast með ljósrit af vegabréfi þínu.
Þann  24. nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki og er það algjörlega á  ábyrgð þess sem ferðast að vegabréf hans sé gilt. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið. 


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. En við bendum farþegum einnig á að hafa með Evrópska sjúkratryggingakortið með í för, sem veitir rétt á allri nauðsynlegri heilbrigðisþjónustu á ríkisreknum stofnunum í löndum EES. Nánari upplýsingar má nálgast hjá Sjúkratryggingum Íslands (www.sjukra.is).  Þess ber að geta að nánast öll heilsugæsla og öll sjúkrahús á suðurhluta eyjunnar eru einkarekin og því er æskilegt að hafa með sér tryggingarkort/ pappíra frá ykkar tryggingarfélagi með nafni ykkar og tryggingarnúmeri. Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.

TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upplýsingagjöf, úthluta matarmiðum og jafnvel hótel eftir lengd og eðli seinkana. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.



FARANGUR & FARANGURSHEIMILD
Þrjú flugfélög annast flug Heimsferða til og frá Gran Canaria. Vinsamlegast athugið að farangursheimild er mismunandi eftir flugfélagi. Athugið einnig að farþegar gætu átt flug með sitthvoru flugfélaginu á út og heimleið. Leyfilegur farangur flugfélaga:

Travel Service, leyfileg hámarksþyngd á innrituðum farangri 23 kg taska á hvern farþega auk 8 kg í handfarangur
(hámarks stærð á tösku í handfarangri er 54x45x25 cm). 

Iceland Air, leyfileg hámarksþyngd á innrituðum farangri 23 kg taska á hvern farþega auk 10 kg í handfarangur
(hámarks stærð á tösku í handfarangri er 55x40x20 cm).

Neos Air, leyfileg hámarksþyngd á innrituðum farangri 20 kg taska á hvern farþega auk 5 kg í handfarangur
(hámarks stærð á tösku í handfarangri 55x40x20 cm).

Ef farangur skilar sér ekki eða skemmist í flugi verður farþegi að gera skýrslu um málið hjá þjónustuaðila á flugvelli, ef ekki er gerð skýrsla fæst tjónið einfaldlega ekki bætt. Passið vel upp á að gleyma engu um borð í flugvélinni!

SÆTABÓKANIR
Heimsferðir bjóða nú viðskiptavinum sínum upp á að velja sér sæti í flugvélinni, gegn gjaldi í síma 595-1000 eða á skrifstofu Heimsferða. Vinsamlegast athugið að sætabókanir geta breyst án fyrirvara vegna breytinga á flugáætlun eða annarra ófyrirsjáanlegra kringumstæðna. Í slíkum tilfellum er ávallt reynt að útvega viðskiptavini sambærilegt sæti með svipaða staðsetningu í flugvélinni, eins og upphafleg bókun segir til um. Athugið að sætabókanir fást ekki endurgreiddar nema að um verulega tilfærslu hafi verið að ræða. Farþegi þarf þá að framvísa brottfararspjaldi sem sýnir úthlutað sæti á viðkomandi flugi.

Ákveðnar reglur gilda um farþega í hjólastól. Þeir farþegar geta eingöngu bókað sér sæti við glugga. Farþegum með skerta hreyfigetu er ekki heimilt að bóka sæti fyrir miðju eða við gang.

GJALDMIÐILL OG KREDITKORT
Gjaldmiðillinn á Gran Canaria er Evra (EUR).  Athugið að almennt er ekki hægt að nota annan gjaldmiðil í verslunum, en hægt er að skipta öðrum gjaldmiðlum í bönkum. Nánari upplýsingar um gjaldmiðla gagnvart íslensku krónunni má finna á vefsíðunni www.oanda.com. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400


VIÐ KOMU
Fararstjórar Heimsferða taka á móti hópnum á flugvellinum í Las Palmas með skilti frá Heimsferðum og íslenskan fána. Þeir sem eiga ekki bókaða rútu frá flugvelli fá afhent ferðagögn hjá fararstjórum á flugvellinum. Þeir farþegar sem eiga bókaða rútu á vegum Heimsferða verður ekið í rútu frá flugvelli og upp á hótel þar sem þau fá sín ferðagögn afhend. Rútuferð á hótel tekur um 30 mínútur.

Rútuferðirnar eru bókaðar heima á Íslandi og ekki er hægt að tryggja að laust sé, ef ekki hefur verið bókað fyrir fram. Gætið þess að koma sjálf farangri ykkar í rútuna til að tryggja að hann verði ekki eftir á flugvellinum. Ath. að ef farangur skemmist þarf að tilkynna það á flugvelli, ekki er hægt að fá skýrslu gerða eftir að flugvöllurinn hefur verið yfirgefinn og vert að nefna að hvorki farangur né töskutjón eru  bætt ef skýrsla er ekki gerð.

RÚTUFERÐ TIL & FRÁ FLUGVELLI
Ath. þeir sem eru með bókaða rútuferð til og frá flugvelli, þá er gert ráð fyrir að hver farþegi ferðist með 1-2 töskur  hámark, og kerrur fyrir börnin. Ef ferðast er með annan farangur t.d íþróttabúnað eða rafmagnshjólastóla er ekki víst að farangursrými rútunnar sé nægilega stórt til að hægt sé að taka við því. Heimsferðir bera ekki ábyrgð á því ef rútan getur ekki heimilað þannig farangur og því mikilvægt að fá það staðfest áður en ferðast er. Best er að hafa samband við skrifstofuna og fá nánari upplýsingar fyrir brottför.


KYNNISFUNDUR & VIÐTALSTÍMAR

Kynnisfundur fararstjóra Heimsferða er í rútu á leið frá flugvelli að hóteli eða daginn eftir komu, staðsetning fundar er kynnt í rútunni. Við ráðleggjum öllum að mæta, því réttar upplýsingar í byrjun sumarleyfis geta gert gæfumuninn.  Á kynnisfundum er eyjan Gran Canaria kynnt og hvað er í boði meðan á dvöl þinni stendur. Einnig er farið yfir hagnýtar upplýsingar og hvað ber að varast. Meðan á dvöl stendur eru fararstjórar með viðtalstíma á hótelum, sjá dagskrá og viðtalstíma í gögnum frá fararstjóra og í upplýsingarmöppu á hóteli. Í viðtalstímum fer fram skráning farþega í kynnisferðir og alhliða aðstoð við farþega. Ekki hika við að leita til fararstjóra ef um veikindi er að ræða. Neyðarsímanúmer fararstjóra er + (34) 669 298 899
Þjónustusími er frá kl. 09:00 – 17:00 virka daga. Neyðarsími er frá kl. 17:00 – 09:00 og um helgar.

Ef eitthvað er að varðandi þjónustu hótelanna eða aðbúnaður á herbergi eða íbúð ekki í lagi að þínu mati, verður að láta starfsfólk í móttöku hótela vita strax. Ef hótelið bregst ekki fljótt við leitið þá vinsamlegast við fararstjóra, því ekkert er hægt að gera eftir að heim er komið.

BROTTFÖR
Farþegar  eru vinsamlegast beðnir að líta í upplýsingamöppu Heimsferða sem finna má á viðkomandi gististað daginn fyrir brottför. Farþegar sem aðeins kaupa flugsæti bera sjálfir ábyrgð á að fá brottfarartíma staðfestan. Vert er að hafa í huga að flugtímar geta breyst frá áður útgefnum áætlunum. Stundvísi er keppikefli Heimsferða en á stundum geta orðið seinkanir í flugi sem ferðaskrifstofan fær engu ráðið um.


UPPLÝSINGAMAPPA
Á hverjum gististað er upplýsingamappa Heimsferða. Í henni er að finna ýmsar hagnýtar upplýsingar,  um kynnisferðir, ferðir strætisvagna, verslanir og áhugaverða staði. Í möppunum má einnig finna öll þau skilaboð sem fararstjórar þurfa að koma til farþega meðan á dvöl þeirra stendur. 

ÖRYGGISHÓLF Á GISTISTÖÐUM
Þau heita á spænsku "Caja fuerte", en á ensku "safety box". Við viljum benda gestum á að geyma greiðslukort, gjaldeyri, vegabréf, farseðla og önnur verðmæti í læstu öryggishólfi, sem fást leigð gegn gjaldi í gestamóttöku.  Athugið að farþegar eru sjálfir ábyrgir fyrir lykli hólfsins. Almennt þarf að greiða fyrir notkun á öryggishólfum, en þó eru undantekningar og þar eru öryggishólfin án aukagjalds, þetta fer þó eftir gististöðum.


UMGENGNISREGLUR GISTISTAÐA
Ætlast er til að ró sé komin á kl. 24:00 og eru gestir vinsamlegast beðnir að taka tillit til þess. Aðrar mikilvægar reglur er að finna í hótelmóttöku og eru farþegar beðnir um að kynna sér þær. Farþegar sem brjóta þessar reglur eiga á hættu að vera vísað af gististaðnum. Samkvæmt alþjóðareglum þarf að losa herbergi fyrir eða um hádegi – kynnið ykkur reglur viðkomandi gististaðar varðandi það.


KYNNISFERÐIR
Heimsferðir kappkosta við að bjóða upp á fjölbreytta og skemmtilega dagskrá á Gran Canaria með vandaðri íslenskri leiðsögn. Greiðsla á ferðum og öðru fer fram í hótelheimsóknum og á komufundi, einungis er hægt að greiða með evrum. Athugið að ekki er hægt að greiða með greiðslukortum.


SÓLIN
Við sólbruna eru til mörg góð húsráð, en það besta er kæling. Sé um meiriháttar bruna að ræða ber að hafa tafarlaust samband við lækni. Ástæða er til að benda ykkur á að fara varlega í sólböðin. Gott er að kaupa sér vörn og vera stutt í sólinni fyrstu dagana. Nauðsynlegt er að vera með höfuðfat yfir heitasta tímann. Hafið börnin í bolum fyrst um sinn, og forðist ströndina fyrstu vikuna.


KLÆÐNAÐUR
Gott er að hafa með sér í yfirhöfn þegar farið er í ferðir eða þegar farið er út seinnipartinn og á kvöldin. Það getur orðið mikil hitabreyting á skömmum tíma og því gott að hafa góða flík til að bregða sér í.

LÆKNAR
Hægt er að ná í enskumælandi lækni allan sólarhringinn á Clinica Las Palmeras: sími 928 763 366.

Ef leita þarf á sjúkrahús: Clinica Roca sími 928 769004 og San Roque Maspalomas með íslenskum starfsmanni (Rúna frá kl. 09:00 til 14:00, sími 928 012600). Ef ekki næst í fararstjóra biðjið þá um aðstoð í gestamóttöku. Áður upptaldar sjúkrastofnanir eru einkareknar. Nauðsynlegt er að hafa með sér vegabréf og tryggingakort og/eða pappíra þegar farið er á heilsugæslu eða sjúkrahús.

TANNLÆKNIR
Ef þið þyrftuð að leita til tannlæknis má benda á tannlæknastofuna Mercurio sími 928 770 819 og Clinica Las Palmeras sími 928 763 366 eða hafið samband við fararstjóra.

DRYKKJARVATN
Vatnið í krönunum er drykkjarhæft í flestum tilfellum en við viljum benda fólki á að kaupa drykkjarvatn, sem inniheldur steinefni (mineral), þar sem steinefnin tapast úr líkamanum í hitanum. 1 – 2 lítrar af vatni á dag er hæfilegur skammtur ásamt öðrum drykkjum. Hjúkrunarfólk á Íslandi bendir á orkudrykkinn Gatorade sem er án koffíns, en með þau steinefni og sölt sem tapast við útgufun.

MAGAVEIKI
Margir verða fyrir því að fá í magann og vilja gjarnan kenna matnum um. Í fæstum tilfellum er um matareitrun að ræða, heldur er um breytt loftslag, breyttar svefnvenjur eða breytt mataræði að ræða, einnig ef notaður er mikill klaki í drykki. Ef þið kennið ykkur meins, hafið þá samband við fararstjóra eða lækni.


KREDITKORT
Yfirleitt er hægt að nota kreditkort og ráðleggjum við ferðalöngum að hafa slík kort með sér þó ekki sé nema öryggisins vegna. VISA og EURO eru jafngild. Einnig er hægt að taka út peninga á kortin í hraðbönkum, en þá þurfa korthafar að vita PIN númerið sitt. Sums staðar er beðið um vegabréf þegar greitt er með kreditkorti. Ef kort tapast, hringið í viðkomandi neyðarnúmer og látið loka kortinu: VISA (00354) 525 2000 eða 525 2200.  EURO (00354) 533 1400. Með tilkomu nýrra posa er nauðsynlegt að muna pin númerið sitt! Geymið aldrei upplýsingar um pin númer hjá kortinu. Ath. þó nokkuð af veitingastöðum og litlum búðum taka ekki við kreditkortum heldur þarf að greiða með pening.


OPNUNARTÍMI BANKA & APÓTEKA   
Bankar eru opnir frá mánudegi - fimmtudaga frá 08:00 – 14:00.  Hraðbankar eru víða en minnt er á að þiggja ekki aðstoð frá ókunnugum við hraðbanka og alls ekki gefa upp pin-númerið. Öruggast er að nota hraðbanka við bankaútibú.

Apótek eru opin frá 09:30-13:00 og 17:00-20:00 mánudaga til föstudaga. Eitt til tvö apótek (farmacia) eru á vakt um helgar og nætur. Hótelafgreiðslur og leigubílstjórar vita flest hvaða apótek er á vakt.

ÞJÓRFÉ
Enn er það siður á Spáni að gefa þjórfé, en aðeins ef þið eruð ánægð með þjónustuna. Vaninn er að gefa um 5% á veitingastöðum, en herbergisþernum er ágætt að gefa 5 – 10 evrur á viku (hægt að leggja á koddann), allt eftir því hvort þið eruð ánægð eða ekki. Eins er siður að gefa bílstjórum einhverja smámynt í lok ferðar. Athugið að enginn er skyldugur að gefa þjórfé!



MARKAÐUR
Útimarkaður er haldinn alla miðvikudaga og laugardaga í Maspalomas. Hann er opinn frá kl 09:00-13:00. Takið strætisvagn nr. 72 eða leigubíl. Í öllum helstu þorpum á eyjunni eru útimarkaðir einn eða fleiri daga í viku. Munið að prútta vel og passa veskin.


ÞVOTTAHÚS
Á sumum gististöðum okkar er hægt að láta í þvott, athugið í gestamóttökum. Ef ekki er um slíka þjónustu að ræða hjá ykkur, þá bendum við á tvö þvottahús þar sem þið setjið í góðan plastpoka
(5 kg. ca.) síðan er hægt að sækja hann yfirleitt daginn eftir. Munið að taka það fram ef þið viljið láta strauja eða ekki. Eitt þvottahús er í YUMBO CENTRUM og annað í SAN FERNANDO CENTRUM.


LEIGUBÍLAR & STRÆTISVAGNAR
Leigubíla er yfirleitt auðvelt að finna. Innheimt er eftir gjaldmæli en góð regla er að spyrja um verð áður en lagt er af stað. Gott er að taka niður leigubílanúmer bílsins áður en lagt er af stað ef eitthvað skyldi verða eftir í bílnum.

Strætisvagnar eru grænir að lit merktir GLOBAL og ganga í allar áttir. Mjög auðvelt er að fara t.d. með vagni inn til Las Palmas sá vagn er nr: 30. Vagninn sem gengur til Puerto Rico er nr: 32, en vagninn sem fer í Palmitos Park er nr: 45. Flestir vagnar eru á 20 mín fresti. Nánari upplýsingar í hótelmöppu Heimsferða. Einnig er hægt að nálgast leiðarkort í upplýsingamiðstöð ferðamanna við Yumbo Center.


ÍSLENSKUR RÆÐISMAÐUR
Það er íslenskur ræðismaður á Gran Canaria og heitir Hr. Jaiver Betancor Jorge, Skrifstofa: Avenida de Canarias 22 - bajo Edificio Bitacora, Las Palmas. Sími: (928) 365 870. Fax: (928) 360 357. Netfang: canaryislands@icelandconsulate.es.



GOLF

Mjög góð aðstaða er í CAMPO DE GOLF MASPALOMAS sími 928 762581.
Aðrir góðir golfvellir eru: MELONERAS GOLF sími 928 14 53 09, SALOBRE GOLF sími 928 01 01 03 og CAMPO DEL GOLF BANDAMA sími 928 350104 (Ath. að þangað eru um 1 klst. akstur).
Panta þarf tíma fyrir fram á netinu eða í síma til að fá rástíma.

BÍLALEIGUBÍLAR
Fyrir milligöngu fararstjóra er hægt að leigja bílaleigubíla, íslenskt ökuskírteini nægir. Munið að panta með góðum fyrirvara. Við mælum með Jurecar bílaleigunni. Nánari upplýsingar veita fararstjórar.

MINNT ER Á
Að aldrei er of varlega farið á ferðalögum. Vasaþjófa er að finna hér eins og um allan heim og því viljum við benda farþegum okkar á að leggja aldrei verðmæti frá sér á glámbekk, því myndavélar, símar, tölvur, töskur og veski eru freistandi í augum þess sem ætlar sér að stela. Hafið tafarlaust samband við fararstjóra ef verðmætum er stolið af ykkur, sem aðstoðar þá við skýrslugerð á lögreglustöð. Minnt er á að gott er að vera með allar tryggingar á hreinu áður en haldið er af stað í ferðalag til útlanda.



TÍMAMISMUNUR
Klukkan færist aftur um eina klukkustund aðfaranótt sunnudagsins 28. október 2018, þegar klukkan er 03:00 um nóttina breytist klukkan og verður 02:00. Klukkan færist fram um eina klukkustund aðfaranótt sunnudagsins 31. mars 2019, þegar klukkan er 02:00 um nóttina breytist klukkan og verður 03:00.

Deila núverandi vefslóð með tölvupósti