Sól
Borg
Golfferðir
Sérferðir
Hreyfing
Sigling
Flugsæti

Costa del sol & Marbella - sumar 2019

HAGNÝTAR UPPLÝSINGAR

ALMENNAR UPPLÝSINGAR
Spánn er um 504.600 km² að stærð og íbúafjöldi landins telur rúmar 47 milljónir. Costa del sol er svæði í suðurhluta Spánar (Andalúsíu) og samanstendur af strandsvæðum og bæjum meðfram ströndinni í Malaga-héraði. Má þar nefna t.d. Torremolinos, Benalmadena, Fuengirola, Marbella og Estepona. Höfuðborg Costa del sol er Malaga og þar búa um 570 þúsund manns. Á Spáni er móðurmálið spænska og hana tala langflestir.  Á Spáni er klukkan 2 klst á undan íslenska tímanum frá lok mars til lok októbers – annars er tímamismunur 1 klst frá lok október til lok mars.


VEGABRÉF
ATHUGIÐ í tíma hvort vegabréfið ykkar sé í gildi! Nauðsynlegt er að hafa gilt vegabréf í ferð til Spánar en Íslendingar þurfa ekki vegabréfsáritun (visum). Ef ekki er hægt að framvísa við innritun á flugvelli, fullgildu og löglegu vegabréfi, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Þann  24.nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki. Farþegar bera einir ábyrgð á því að vegabréf sé gilt og sé viðkomandi meinað að ferðast vegna ófullnægjandi skilríkja, fæst ferðin ekki endurgreidd af hendi ferðaskrifstofunnar. Gott ráð er að hafa meðferðis ljósrit af vegabréfinu. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið.


FLUG & FLUGVÖLLUR
Flogið er til Malaga og tekur akstur frá flugvellinum um ½ - 2 klst fer eftir umferð hverju sinni og einnig staðsetningu hótelsins. Flugvöllurinn heitir Malaga-Costa del sol airport. Flugtíminn til Malaga frá Keflavík er um 4 ½ klst. Mæta þarf til innritunar á flugvöll eigi síðar en 2 klst fyrir áætlaða brottför.


TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upplýsingagjöf, úthluta matarmiðum og jafnvel hótel eftir lengd og eðli seinkanna. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. En við bendum farþegum einnig á að hafa með Evrópska sjúkratryggingakortið með í för,  sem veitir rétt á allri nauðsynlegri heilbrigðisþjónustu á ríkisreknum stofnunum í löndum EES. Nánari upplýsingar má nálgast hjá Sjúkratryggingum Íslands (www.sjukra.is). Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.

Gott er að hafa meðferðis tryggingarkort frá sínu tryggingarfélagi til að flýta fyrir allri afgreiðslu ef eitthvað kemur uppá.

FARANGUR & FARANGURSHEIMILD
Flogið er með ítalska leiguflugfélaginu Neos Air og er leyfileg hámarksþyngd á innrituðum farangri 20kg á hvern farþega auk 5kg í handfarangur (hámark stærð á tösku í handfarangri er 54x40x20 cm). Ef farangur skilar sér ekki eða skemmist í flugi verður farþegi að gera skýrslu um málið hjá þjónustuaðila á flugvelli, ef ekki er gerð skýrsla fæst tjónið einfaldlega ekki bætt. Passið vel upp á að gleyma engu um borð í flugvélinni!


GJALDMIÐILL & KREDITKORT
Gjaldmiðillinn á Spáni er Evra (EUR). Athugið að almennt er ekki hægt að nota annan gjaldmiðil í verslunum, en hægt er að skipta öðrum gjaldmiðlum í bönkum. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400.


VIÐ KOMU Á ÁFANGASTAÐ
Fararstjóri Heimsferða tekur á móti hópnum á flugvellinum og þeim sem eiga pantaða rútuferð er ekið frá flugvelli að hóteli. Tekur sú ferð um ½ - 2 klst en fer eftir umferð og á hversu mörg hótel rútan fer eða staðsetningu hótelsins. Á leiðinni fer fararstjóri yfir helstu atriði sem að hafa ber í huga, sem og dagskrá kynnisferða o.fl. Ekki er hægt að bóka rútu nema á skrifstofu Heimsferða áður en ferðin hefst. Passið vel upp á að gleyma engu um borð í rútunni.


RÚTUFERÐ TIL & FRÁ FLUGVELLI
Fyrir þá sem eiga pantaða rútuferð til og frá flugvelli, þá er gert ráð fyrir að hver farþegi ferðist með að hámarki 1-2 töskur, auk barnakerru ef við á. Ef ferðast er með annan farangur eins og t.d íþróttabúnað eða rafmagnshjólastóla er ekki öruggt að farangursrými rútunnar sé nægilega stórt til að taka á móti slíkum farangri. Heimsferðir bera ekki ábyrgð á því ef rútan getur ekki heimilað slíkan farangur og því mikilvægt að fá það staðfest áður en ferðast er. Best er að hafa samband við ferðaskrifstofuna og fá nánari upplýsingar fyrir brottför.


þJÓNUSTA Á ÁFANGASTAÐ
Fararstjóri er fulltrúi ferðaskrifstofunnar á staðnum og sinnir farþegum meðan á dvöl þeirra stendur. Ef farþegi telur að eitthvað sé ábótavant varðandi þjónustu hótels eða ónægja er með íbúð/herbergi skal gera fararstjóra og/eða starfsfólki hótelsins viðvart, því ekkert er hægt að gera eftir að heim er komið.  Fararstjóri er með þjónustu- og fyrirspurnarsíma sem er opinn á milli kl: 09:00-17:00 alla daga og er númerið 822 9092. Einnig má finna númerið í upplýsingarmöppum Heimsferða á öllum hótelum.


NEYÐARNÚMER
Neyðarnúmer fararstjóra er opið allan sólarhringinn fyrir alger neyðartilfelli og er númerið 822 9092. Einnig má finna neyðarnúmerið í upplýsingamöppu Heimsferða á hótelinu.


GISTISTAÐIR
Gestir eru vinsamlegast beðnir að kynnar sér reglur hótelsins og virða almennar umgengnisreglur, m.a um næturkyrrð. Samkvæmt alþjóðareglum þarf að losa herbergi/íbúð ýmist fyrir hádegi eða á hádegi á brottfarardegi. Einstaka hótel fer fram á tryggingargjald sem er endurgreitt við brottför ef ekkert tjón hefur orðið á herbergi/íbúð meðan á dvöl stóð. Þá getur hótelið farið fram á kreditkortanúmer sem tryggingu meðan á dvöl stendur.


VIÐTALSTÍMAR
Fararstjórar eru með fasta viðtalstíma fyrir alla  gististaði  Heimsferða.  Í viðtalstímum fer fram skráning farþega í kynnisferðir og alhliða aðstoð við gesti.  Hikið ekki við að leita strax til fararstjóra ef um veikindi er að ræða.
Á hverjum gististað er einnig upplýsingamappa Heimsferða.  Í henni er að finna hagnýtar upplýsingar, upplýsingar um kynnisferðir og öll þau skilaboð sem fararstjórar þurfa að koma til farþega. 

BROTTFÖR
Þeir sem eiga pantaða rútuferð frá hóteli á flugvöll fá brottfarartíma staðfestan hjá fararstjóra. Vinsamlegast  skoðið upplýsingamöppu Heimsferða á hótelinu. Farþegar þurfa að skrá sig út af herbergjum fyrir eða um hádegi á brottfarardegi. Hótelmóttakan sér um að geyma farangur fram að brottför ef á þarf að halda. Þeir sem eru eingöngu bókaðir í flugsæti bera sjálfir ábyrgð á því að fá brottfarartíma staðfestan á flugvelli eða skrifstofu Heimsferða á Íslandi í síma 00354-595-1000.


TAX-FREE
Flestar verslanir bjóða upp á svokallað Tax-Free ef keypt er fyrir ákveðna upphæð í viðkomandi verslun. Verslunin fyllir þá út sérstakt eyðublað sem viðskiptavinir þurfa að fá stimplað hjá tollvörðum á flugvellinum við brottför.  Ath. að þetta er gert fyrir innritun á flugvelli og hafa tollverðir leyfi til þess að óska eftir að sjá varninginn sem verslaður var. Í verslun þarf að framvísa vegabréfi þegar sótt er um Tax-Free.


SÍMI, RAFMAGN & TÖLVUR
Á Spáni er rafmagnið 220 volt eins og hér á Íslandi. Þegar hringt er úr íslenskum síma frá Spáni og í íslenskt númer skal setja inn 00354- á undan símanúmerinu. Ef hringja skal úr íslenskum síma í spænskt númer skal setja inn 0034- á undan númerinu. Þá er vert að taka fram að þó að hótelið sem dvalið er á, bjóði aðgang að þráðlausu wi-fi, að þá getur internetsambandið á stundum verið höktandi og ekki á það að treysta að fullu.


DRYKKJARVATN
Á Spáni er almennt gott vatn, en í öryggisskyni er farþegum ráðlagt að kaupa drykkjarvatn á flöskum. Í miklum hita er ekki gott að drekka ískalt vatn, betra er fyrir magann að fá vatnið í volgara lagi.


VEÐURFAR
Meðalhiti á Costa del sol yfir sumartímann er um 25-30 gráður en hitinn getur orðið hærri eða lægri eftir tíðarfari. Oft er mikill raki og því gott að drekka nóg af vatni. Ef sólin skín þá mælum við eindregið með notkun sólarvarnar, því sólin getur verið sterk.


VERSLANIR & ÚTIMARKAÐUR
Verslanir eru opnar  frá kl 10.00-13.30 og 16.30-20.00 mánudaga til föstudaga.  Flestar verslanir eru opnar fyrir hádegi á laugardögum en sumar hafa lokað eftir hádegi.  Á sunnudögum er yfirleitt lokað. Ath! opnunartími verslana getur veriðbreytilegur. Verslunarmiðstöðvar eru opnar frá kl 10-22 alla daga. 

Aðalverslunarmiðstöðvarnar eru:
Centro comercial Larios, Vialia og Plaza Major í Malaga
Centro comercial La Canada í Marbella
Centro comercial Myramar í Fuengirola
Centro comercial Laguana village í Estepona

Útimarkaður er einu sinni í viku í Torremolinos á fimmtudögum, í Fuengirola á þriðjudögum, í Estepona á miðvikudögum og í Arroyo de la Miel ( hjá tívolíinu) á föstudögum. Yfirleitt eru útimarkaðirnir opnir fyrir hádegi.

ÞJÓRFÉ
Almennt er þjónustugjald ekki innifalið á veitingastöðum og tíðkast því að gefa um 10% þjórfé. Oftast er einnig gefið þjórfé til leigubílstjóra, burðarmanna og annarra sem veita góða þjónustu.


LÆKNAR & APÓTEK
Góð læknisþjónusta er á staðnum og er hægt að fá enskumælandi lækni heim á hótel með milligöngu fararstjóra.  Upplýsingar um læknisþjónustu er að finna í upplýsingamöppu Heimsferða á hótelunum.  Íslendingar eru tryggðir innan EES ef um ríkisreknar heilsugæslur og sjúkrastofnanir er að ræða en ekki á einkareknum stofnunum. Mikilvægt er að vera vel tryggður. Opnunartími apóteka er frá 9:00-13:00 og 16:30-20:00 en einnig er nætur og helgidagaþjónusta. Leigubílstjórar og starfsfólk í hótelmóttöku vita yfirleitt hvaða apótek er á vakt hverju sinni.


ÍSLENSKUR RÆÐISMAÐUR
Ræðismaður Íslands á Costa del sol er  Per Dover Petersen. Heimilisfang: Edif. Ronda I, 3B, Paseo Marítimo 91. ES-29640 Fuengirola (Málaga). Sími: 0034 952 661 200. Netfang: info@isconsul.com.


ÞJÓFNAÐUR
Líkt og á öðrum ferðamannastöðum, er vasaþjófnaður til staðar. Oft má koma í veg fyrir slíkt með því að vera á varðbergi. Athugið að skilja aldrei við ykkur veski, töskur eða annað verðmætt.

GOLF
Costa del Sol er paradís golfara. Hér er fjöldi golfvalla fyrir jafnt áhugamenn sem atvinnumenn eins og t.d. Torrequebrada golfvöllurinn er í Benalmadena og Mijas Golf eru báðir mjög fallegir vellir og ekki erfiðir. Einnig eru fjöldi fallegra golfvalla í kringum Marbella sem eru spennandi viðfangsefni.


MATUR & SKEMMTUN
Matur á Spáni er mjög góður, mikið úrval frábærra veitingastaða frá öllum heimshornum er að finna á Costa del Sol.

Við mælum með að fólk prófi að fá sér „palleu“ sem er helsti þjóðarréttur Spánar ásamt köldu tómasúpunni „caspacho“.
Það eru margir góðir sjávarréttarstaðir sem bjóða uppá girnilegt sjávarfang frá þessu svæði og þá sérstaklega þeir sem eru staðsettir við ströndina. Einnig eru margir flottir tapas staðir sem bjóða uppá allskonar smárétti og þ.á.m. „pitufo catalan“ sem er brauð með hráskinku, tómatmauki og olíu.

KYNNISFERÐIR
Í boði spennandi kynnisferðir meðan á dvöl ykkar stendur, þó skal tekið fram að lágmarksþátttaka í ferðirnar með íslenskum fararstjóra miðast við 20 manns. Ef ekki næst næg þátttaka getur fararstjóri verið fólki innan handar með ferðir með enskumælandi fararstjórum.  Kynnisferðir eru bókaðar í viðtalstímum og einungis er tekið við evrum sem greiðslu – ekki er tekið við kreditkortum eða íslenskum krónum.

Deila núverandi vefslóð með tölvupósti