Sól
Borg
Golfferðir
Sérferðir
Hreyfing
Sigling
Flugsæti

Agadír - Haust 2018

HAGNÝTAR UPPLÝSINGAR

ALMENNAR UPPLÝSINGAR
Marokkó, sem er í Norður-Afríku, er 446.550 km² að stærð og samkvæmt manntali frá 2015 eru íbúar um 36 milljónir. Marokkó er gædd bæði afrískum og evrópskum áhrifum enda er sundið á milli Spánar og nyrsta hluta Marokkó ekki nema um 10 km. Höfuðborg landsins heitir Rabat. Strandbærinn Agadir telur um 500.000 íbúa og kúrir bærinn á milli Atlas fjallgarðsins og strandlengju Atlantshafsins. Arabíska er hið opinberlega mál innfæddra en nær allir tala frönsku og flest allir, sér í lagi í þjónustustörfum, tala góða ensku. Öll upplýsingaskilti eru t.a.m. bæði á arabísku og frönsku. Frá 26. október og til lok mars er sami tími í Marokkó og á Íslandi en klukkutíma mismunur er frá mars og til október.


VEGABRÉF
Nauðsynlegt er að hafa gilt vegabréf í ferð til Marokkó eins og til annarra landa. Ef ekki er hægt að sýna við innritun á flugvelli, fullgilt og löglegt vegabréf, hafa starfsmenn á Keflavíkurflugvelli ekki heimild til að leyfa viðkomandi farþega að ferðast og er ekki um neinar undanþágur frá því að ræða. Ekki er hægt að fá framlengingu á vegabréfi úti á flugvelli í Keflavík. Gott ráð er að athuga í tíma hvort vegabréf þitt sé enn í gildi og einnig er gott að ferðast með ljósrit af vegabréfi þínu. Þann  24.nóvember 2015 breyttust reglur um vegabréf og eru framlengd vegabréf ekki lengur talin gild ferðaskilríki. Farþegar bera algjörlega einir ábyrgð á því að vegabréf sé gilt og sé viðkomandi meinað að ferðast vegna ófullnægjandi skilríkja, fæst ferðin ekki endurgreidd af hendi ferðaskrifstofunnar. Farþegar með erlent vegabréf þurfa sjálfir að kanna hvort þeir þurfa vegabréfsáritun inn í landið.


FLUG & FLUGVÖLLUR
Flugvöllurinn í Agadir heitir Al Massira airport og er flugtíminn til Agadir frá Keflavík um 5 tímar og 20 mínútur. Mæta þarf til innritunar á flugvöll eigi síðar en tveimur tímum fyrir áætlaða brottför. Fylla þarf út miða vegna komu til landsins og einnig við brottför frá Marokkó, sem farþegar nálgast á flugvelli við vegabréfaskoðun.


TAFIR Í FLUGI
Stundvísi er keppikefli Heimsferða en óhjákvæmilega geta orðið tafir á flugi í öllum flugrekstri, sem ferðaskrifstofan getur á engan hátt borið ábyrgð á. Ef verður töf á flugi eftir að innritun á flugvelli hefur farið fram, fer í gang verkferli samkvæmt alþjóðareglum. Þjónustuaðilar á flugvelli (handling agent) skal þá fyrir hönd flugfélagsins veita upplýsingagjöf, úthluta matarmiðum og jafnvel hótel eftir lengd og eðli seinkanna. Farþegar þurfa að fylgjast vel með í kallkerfi flugvallar og gera vart við sig hjá viðkomandi þjónustuaðila (handling agent), til þess að fá upplýsingar. Gott er að hafa hugfast að fyrstu og bestu upplýsingarnar fást á flugvellinum og ferðaskrifstofa eða fararstjóri fær nákvæmlega sömu upplýsingar og farþegi. Verði veruleg töf er gott að hafa hugfast að jákvætt hugarfar er góður ferðafélagi.


TRYGGINGAR
Farþegar bera sjálfir ábyrgð á því að tryggingar þeirra séu í lagi meðan á ferð þeirra stendur. Hafi ferðin verið greidd með kreditkorti, er farþegi oft með góðar tryggingar í þeim kortum. Nánari upplýsingar má nálgast hjá Sjúkratryggingum Íslands (www.sjukra.is). Ef farþegi kýs að fara á einkarekna sjúkrastofnun á hann ekki rétt á endurgreiðslu í öllum tilfellum, því er mikilvægt að kanna tryggingar sínar vel fyrir brottför.


FARANGUR & FARANGURSHEIMILD
Flogið er með flugfélaginu Travel Service og er leyfileg hámarksþyngd á innrituðum farangri 20kg taska á hvern farþega auk 5kg í handfarangur (hámark stærð á tösku í handfarangri er 54x45x25 cm). Ef farangur skilar sér ekki eða skemmist í flugi verður farþegi að gera skýrslu um málið hjá þjónustuaðila á flugvelli, ef ekki er gerð skýrsla fæst tjónið einfaldlega ekki bætt. Passið vel upp á að gleyma engu um borð í flugvélinni!


GJALDMIÐILL & KREDITKORT
Gjaldmiðillinn á Marokkó er Dirham. Dirham fæst ekki á Íslandi en bæði hægt er að taka með evrur og fá þeim skipt, en einnig eru hraðbankar mjög víða í Agadir og gjarnan inni á hótelunum. Einn Dirham eru tæplega 11 ISK samkvæmt skráningu í okt 2017. Öll helstu kreditkort er hægt að nota í verslunum og hraðbönkum í borginni, en nauðsynlegt er að vita pin-númer viðkomandi korts. Ef kort tapast, hringið í neyðarnúmer kortafyrirtækjanna og látið loka kortinu: VISA (00354) 525 2000 eða 525 2200. MASTERCARD (00354) 533 1400.


VIÐ KOMU Á ÁFANGASTAÐ
Fararstjórar Heimsferða taka á móti hópnum á flugvellinum og þeim sem eiga pantaða rútuferð er ekið frá flugvelli að hóteli. Tekur sú ferð um 45 mínútur en fer dálítið eftir umferð og á hversu mörg hótel rútan fer. Á leiðinni fara fararstjórar yfir helstu atriði sem að hafa ber í huga, sem og dagskrá skoðunarferða o. fl. Ekki er hægt að bóka rútu nema á skrifstofu Heimsferða áður en ferðin hefst. Passið vel upp á að gleyma engu um borð í rútunni.


RÚTUFERÐ TIL & FRÁ FLUGVELLI
Fyrir þá sem eiga pantaða rútuferð til og frá flugvelli, þá er gert ráð fyrir að hver farþegi ferðist með að hámarki 1-2 töskur, auk barnakerru ef við á. Ef ferðast er með annan farangur eins og t.d íþróttabúnað eða rafmagnshjólastóla er ekki öruggt að farangursrými rútunnar sé nægilega stórt til að taka á móti slíkum farangri. Heimsferðir bera ekki ábyrgð á því ef rútan getur ekki heimilað slíkan farangur og því mikilvægt að fá það staðfest áður en ferðast er. Best er að hafa samband við ferðaskrifstofuna og fá nánari upplýsingar fyrir brottför.


ÞJÓNUSTA Á ÁFANGASTAÐ
Fararstjórar eru fulltrúar ferðaskrifstofunnar á staðnum og sinna farþegum meðan á dvöl þeirra stendur. Ef eitthvað er að varðandi þjónustu hótels eða ónægja með íbúð/herbergi skal gera farastjóra og/eða starfsfólki hótelsins viðvart, því ekkert er

hægt að gera eftir að heim er komið. Fararstjórar eru með þjónustu- og fyrirspurnarsíma sem finna má í upplýsingamöppu/umslagi sem fararstjórar afhenda farþegum við komu til Marokkó.


NEYÐARNÚMER
Neyðarnúmer fararstjóra er opið allan sólarhringinn fyrir alger neyðartilfelli og er númerið:  00212 766 85 22 24


GISTISTAÐIR
Gestir eru vinsamlegast beðnir að kynnar sér reglur hótelsins og virða almennar umgengnisreglur, m.a um næturkyrrð. Samkvæmt alþjóðareglum þarf að losa herbergi/íbúð ýmist fyrir hádegi eða á hádegi á brottfarardegi. Einstaka hótel fer fram á tryggingargjald sem er endurgreitt við brottför ef ekkert tjón hefur orðið á herbergi/íbúð meðan á dvöl stóð. Þá getur hótelið farið fram á kreditkortanúmer sem tryggingu meðan á dvöl stendur.

BROTTFÖR
Þeir sem eiga pantaða rútuferð frá hóteli á flugvöll fá brottfarartíma staðfestan hjá fararstjóra. Einnig má sjá brottfaratíma frá hóteli á dagskrárblöðum sem farþegar fá afhent í ferðinni. Farþegar þurfa að skrá sig út af herbergjum fyrir eða um hádegi á brottfarardegi. Hótelmóttakan sér um að geyma farangur fram að brottför ef á þarf að halda. Þeir sem eru eingöngu bókaðir í flugsæti bera sjálfir ábyrgð á því að fá brottfarartíma staðfestan á flugvelli eða skrifstofu Heimsferða á Íslandi í síma 00354-595-1000


SÍMI, RAFMAGN, TÖLVUR
Í Marokkó er rafmagnið 220 volt eins og hér á Íslandi. Þegar hringt er úr íslenskum síma frá Marokkói og í íslenskt númer skal setja inn 00354- á undan símanúmerinu. Ef hringja skal úr íslenskum síma í marokkóskt númer skal setja inn 00212- á undan númerinu. Þá er vert að taka fram að þó að hótelið sem dvalið er á, bjóði aðgang að þráðlausu wi-fi, að þá getur internetsambandið á stundum verið höktandi og ekki á það að treysta að fullu.

ATH! það getur verið mjög dýrt að hringja úr íslenskum farsímum í Marokkó og einnig ef farið er á internetið þar sem notað er íslenskt gagnamagn. Best er að hafa slökkt á gagnamagninu og kynna sér verðskrá símafyrirtækisins.

DRYKKJARVATN
Á Marokkó er almennt gott vatn, en við ráðleggjum farþegum þó að kaupa drykkjarvatn á flöskum. Í miklum hita er ekki gott að drekka ískalt vatn, betra er fyrir magann að fá vatnið í volgara lagi. Bursta má tennur úr kranavatni.


VEÐURFAR
Meðalhiti í Marokkó í október er um 20-25 gráður. Oft er mistur yfir borginni snemma á morgnanna en svo dregur ský frá sólu og þá mælum við eindregið með því að borin sé á sig sólarvörn, því sólin getur verið mjög sterk hér.


VERSLANIR
Marokkó er hvað þekktast fyrir sína risa markaði og í Agadir er einn slíkur, Souk Al-Ahad, sem vert er að heimsækja. Hér er hægt að kaupa allt milli himins og jarðar, allt frá kertaluktum og fatnaði, upp í krydd, ávexti, grænmeti og kjöt og fisk. Og þó maður versli ekki neitt, er upplifun að koma hingað í þessa vöggu menningar þeirra Marokkóbúa. Markaðurinn er lokaður á mánudögum. Í Marina hverfinu (snekkjubátahöfninni) er m.a. að finna verslunina Zara, Mango og Mexx. Stórir „súpermarkaðir“ eins og Marjane er opinn frá kl: 09:00-22:00 alla daga. Í Uniprix, sem einnig er súpermarkaður er nokkuð stór deild sem selur m.a. úrval af áfengi. Flestir veitingastaðir og barir selja vín og bjór á sínum stöðum en það er ekki algilt. Kaffihúsin í Agadir eru yfirleitt opin frá 06:00-23:00 og tilvalið að setjast niður og gæða sér á góðu kaffi eða hinu frábæra myntutei sem þeir eru svo þekktir fyrir.


SAMGÖNGUR
Auðvelt er að nálgast leigubíla í Agadir, en þeir eru auðþekktir, rauðir og merktir „Taxi“ . Þeir kallast „petit-taxi“ eða litli leigubíllinn og þið skiljið hvers vegna þegar þið sjáið þá J. Þeir eru með gjaldmæli og má veifa þeim út á götu eða fá hótelin til þess að hringja á þá.


ÞJÓRFÉ
Almennt er þjónustugjald ekki innifalið á veitingastöðum og tíðkast því að gefa um 10% þjórfé. Oftast er einnig gefið þjórfé á hárgreiðslustofum, snyrtistofum til leigubílstjóra, burðarmanna og annarra sem ykkur finnst veita góða þjónustu.


LÆKNAR & APÓTEK
Ef þarf á læknisaðstoð að halda er hægt að fá aðstoð enskumælandi læknis í síma: 00212-661-220-561. Látið einnig fararstjóra vita ef leita þarf aðstoðar læknis.


ÍSLENSKUR RÆÐISMAÐUR
Samkvæmt upplýsingum á heimasíðu Utanríkisráðuneytis Íslands er kjörræðisskrifstofa (Honorary Consulate) í Casablanca (Umdæmi: Allt landið nema The Tangier-Tetouan og Eastern (Oriental) regions) Skrifstofan er á 50-52 rue Louizia, CIL, 20200 Casablanca. Sími: (522) 950 955/68,  fax: (522) 393 661,  netfang: consulatislande@menara.ma. Kjörræðismaður (Honorary Consul): Driss Benomar (2003).


ÞJÓFNAÐUR
Líkt og annars staðar í heiminum er gott að vera á varðbergi og aldrei skilja töskur, handtöskur og veski eftir á glámbekk.  Hafið tafarlaust samband við fararstjóra ef þið lendið í þjófnaði, hann mun aðstoða við gerð lögregluskýrslu.

KYNNISFERÐIR
Fjöldi kynnisferða er í boði meðan á dvöl ykkar stendur, þó skal tekið fram að lágmarksþátttaka í ferðirnar með íslenskum fararstjóra miðast við 20 manns. Ef ekki næst næg þátttaka getur fararstjóri verið fólki innan handar með ferðir með enskumælandi fararstjórum.  Kynnisferðir er hægt að bóka í viðtalstímum hjá fararstjóra og einungis er tekið við evrum sem greiðslu – ekki er tekið við kreditkortum eða íslenskum krónum.

Deila núverandi vefslóð með tölvupósti