Skoðunarferðir 2009–2010

Eftirfarandi kynnisferðir eru í boði með íslenskum fararstjóra í vetur:

Sveitaferð (ný ferð) 
Ferð sem seint gleymist með gítar, söng og fjöri. Keyrt er í gegnum Fataga að útsýnisstaðnum Mirador de Tunte og þaðan er haldið áfram til búgarðarins í Taidía sem við heimsækjum. Búgarðurinn hefur að geyma margs konar dýr og fallegan garð. Léttar veitingar eru bornar fram (innifalið í verði) og farþegar fá að upplifa  asnareið (innifalið).  Á leiðinni heim stöðvum við í Santa Lucia og þaðan keyrum við heim í gegnum Agumes. Lagt er af stað um kl. 09.00 og komið til baka um kl. 15.00.

Las Palmas (ný ferð)
Dagsferð til höfuðborgarinnar Las Palmas. Þar búa tæplega 400.000 manns og er borgin sú stærsta á öllum Kanaríeyjum.  Þar er stöðvað við Parque Catalina sem er nálægt tæknisafninu, verslunarmiðstöðinni El Molle, ströndinni og höfninni í borginni. Þar er gefinn frjáls tími þar sem fólk getur verslað, skoðað sig um og jafnvel tekið hring um borgina með útsýnisrútunni.  Lagt er af stað um kl. 09.00 og komið til baka um kl. 17.00.

Markaðsferð til Puerto de Mogán
Markaðurinn í Puerto de Mogán er vinsælasti útmarkaðurinn á eyjunni.  Lagt er af stað snemma að morgni og farið á markaðinn sem er meðfram smábátahöfn bæjarins.  Um hádegið hittist hópurinn og þá snæðum við saman “Tapas” smárétti á veitingastað í Mógan (innifalið í verði).  Síðan er siglt til Puerto Rico og þar bíður rútan okkar til að keyra okkur heim á hótel.
Lagt af stað um kl. 8.30 og komið til baka um kl. 15.00.

Hellaferð
Frábær ferð inn í hinn fagra og djúpa Guayadeque dal.  Við skoðum okkur um á leiðinni, komum við í neðri hellunum og fáum að smakka geitaost og hráskinku, kíkjum inn í híbýli hellisbúa og endum með því að snæða saman á hellaveitingastaðnum Tagoror þar sem er borðaður kanarískur matur / drykkur (innifalið) með lifandi tónlist, kanarískum þjóðdönsum og miklu fjöri. Gítarinn að sjálfsögðu með í ferð. Lagt af stað um kl. 16.00 og komið til baka um kl. 23.00.   

Romm- og vínsmökkun (ný ferð)
Við byrjum á því að keyra norður til Arucas, en bærinn hefur í gegnum aldirnar verið frægur fyrir ræktun á sykri, korni, vínviði og bönunum. Þar skoðum við meðal annars dómkirkjuna, miðbæinn og romverksmiðjuna Í romverksmiðjunni fáum við að smakka á romframleiðslunni. Um hádegið er haldið til bæjarins Tafira þar sem við heimsækjum Casa Del Vino eða Vínhúsið þar sem við lærum að smakka vín og rennum því niður með osti og kexi. Ekta ferð fyrir þá sem hafa gaman af því að kynna sér vín og vínmenningu.
Lagt af stað um kl. 8.30 og komið til baka um kl. 14.00.  

Vakin er athygli á því að lágmarksþátttaka í ferðum er 20 manns. Athugið að skipulagning einstakra ferða getur tekið breytingum eftir því sem aðstæður krefjast eða tilefni gefst til á hverjum tíma.

Aðrar ferðir í boði
Auk ofangreindra ferða er boðið upp á fjölbreytt úrval ferða með enskumælandi fararstjóra. Þar má nefna Bandama og miðhálendið, dýragarðinn - Palmitos Park, vatnagarðinn - Aqualand, göngu- og hjólreiðaferðir, jeppasafarí, Kafbátaferð í Mogán, hellaferð - Guayadeque, Tenerife - Loro Parque dýragarðurinn, sjóstangaveiði, köfun og margt fleira. Nánari upplýsingar eru veittar á hverjum tíma hjá fararstjórum okkar á staðnum.